Presidentja e Komisionit Evropian, Ursula von der Leyen, kërcënoi me ndalimin e eksportit të vaksinave AstraZeneca kundër COVID-19, nëse blloku nuk pranon më parë dërgesat e premtuara nga ana e kompanisë.
“Ky është mesazhi për AstraZeneca: së pari përmbushni kontratën tuaj me Evropën pastaj filloni të dërgoni në vendet e tjera“, i tha von der Leyen grupit mediatik Funke të Gjermanisë.
Ky paralajmërim bëhet në kohën kur vendet e Bashkimit Evropian po përpiqen të përshpejtojnë fushatën e vaksinimit. Shumë vende anëtare po përballen me rritje të numrit të të infektuarve dhe kanë rivendosur kufizimet e lëvizjes.
Von der Leyen tha se kompania farmaceutike anglo-suedeze AstraZeneca kishte shpërndarë vetëm 30% të 90 milionë dozave të vaksinës që kishte premtuar për tremujorin e parë të vitit.
Ursula von der Leyen kishte kërcënuar edhe të mërkurën se do të kërkonte kompetenca emergjente për të bllokuar eksportet e vaksinave për të siguruar “reciprocitet” me furnizuesit e tjerë.
Imunizimi kundër COVID-19 në vendet e Bashkimit Evropian ka ngecur për shkak të vonesave të shpërndarjes së vaksinave por edhe për arsye se disa vende evropiane e pezulluan përdorimin e vaksinës se Oxford-AstraZeneca kundër COVID-19, për shkak të frikës nga efektet anësore të mundshme.
Pavarësisht se rregullatori evropian i barnave tha se vaksina AstraZeneca është e sigurt dhe efektive, disa vende hezitojnë të vazhdojnë fushatat e tyre të imunizimit.
Autoriteti shëndetësor i Finlandës ka njoftuar një pezullim në përdorimin e vaksinës që do të zgjasë të paktën një javë.
Ndërkohë, Suedia, Danimarka dhe Norvegjia thanë të premten se u duhej më shumë kohë për të vendosur nëse do të rinisnin vaksinimet me vaksinën e AstraZeneca-s.
Gjermania, Italia, Franca, Spanja dhe Holanda janë ndër vendet që kanë rifilluar fushatat e tyre të vaksinimit me AstraZeneca. Autoritetet shëndetësore në Francë kanë rekomanduar që vaksina t’u ofrohet vetëm njerëzve të moshës 55 vjeç e lart.
Organizata Botërore e Shëndetësisë (OBSH) u ka kërkuar vendeve të vazhdojnë përdorimin e vaksinës AstraZeneca.
Të premten, ekspertët në OBSH thanë se vaksina kishte “potencial të jashtëzakonshëm për të parandaluar infektimin dhe për të zvogëluar vdekjet në të gjithë botën”.