Komisioni Evropian u kërkoi të martën vendeve anëtare të BE-së që të plotësojnë buxhetin e bllokut me 66 miliardë euro (72 miliardë dollarë) ndërsa paraqiti ndryshimet e tij në kuadrin financiar 2021-2027, raporton AA, përcjell Fol Drejt.
“Ne po kërkojmë nga 27 shtetet tona anëtare 66 miliardë euro për të përmbushur prioritetet e Ukrainës, migracionit dhe konkurrencës”, tha presidentja e Komisionit Evropian Ursula von der Leyen në një konferencë shtypi në Bruksel.
Ajo argumentoi se buxheti shtatëvjeçar i BE-së duhet të rishikohet sepse “ne jemi në një botë krejtësisht të ndryshme në krahasim me vitin 2020” kur u miratua.
“Ne pamë tre vjet krizë pas krize” të përkeqësuar nga lufta e Rusisë kundër Ukrainës dhe “ne ndjemë pasgoditjet me shumë dhimbje në rritjen e çmimeve të energjisë, inflacion më të lartë, norma interesi më të larta”, tha von der Leyen.
Sipas propozimit, BE-ja do të krijojë një “rezervë financiare” për të mbështetur Ukrainën me 50 miliardë euro kredi dhe grante në katër vitet e ardhshme.
Organi ekzekutiv i BE-së kërkon 15 miliardë euro të tjera për të “forcuar menaxhimin e kufijve tanë”.
Nevojitet punë më intensive me fqinjët dhe partneritet i zgjeruar ndërkombëtar, pohoi von der Leyen.
Prandaj, tha ajo, ata kanë nevojë për një buxhet shtesë për refugjatët sirianë në Siri, Liban, Jordani dhe Turqi.
Për më tepër, Komisioni i BE-së do të donte të krijonte një të ashtuquajtur Platformë të Teknologjive Strategjike për Evropën duke mbështetur industritë e teknologjisë së thellë, teknologjisë së pastër dhe bioteknologjisë me një paketë prej 10 miliardë eurosh për të rritur qëndrueshmërinë dhe konkurrencën e BE-së.
Llogaritja e amendamentit përfshin garancitë e kredisë, investimet publike dhe rialokimin e linjave buxhetore tashmë të dhëna.
Buxheti i bllokut 2021-2027 arrin në mbi 2 trilionë euro me çmime aktuale. /FolDrejt/
