Fondi i Sigurisë së Forcës, sipas Partisë Demokratike të Kosovës (PDK), shënjon asgjë më shumë se sa paaftësinë e Qeverisë së Kosovës, për forcuar sigurinë kombëtare.
Pikërisht në ditën kur është hapur llogaria bankare, ndërsa u raportua për derdhjen e mijëra eurove, PDK ka thënë se qeveria aktuale me këtë dëshmon se nuk e kupton sigurinë kombëtare.
“Siguria Kombëtare është element thelbësor që lejon një vend të lulëzojë. Është shqetësuese të shikosh se si kjo qeveri dëshmon paaftësinë e saj për të kuptuar sigurinë kombëtare, e lëre më të jetë në gjendje të identifikojë dhe planifikojë se si t’i trajtojë konkretisht kërcënimet dhe rreziqet e sigurisë ndaj Kosovës”, ka thënë Besa Kabashi, për Klankosova, transmeton Fol Drejt.
Sipas saj, “Fondi i Sigurisë është një përpjekje tjetër e kësaj qeverie për t’u dukur sikur po bëjnë diçka, në kontekstin aktual të sigurisë, por në realitet, po tregon qartë se kjo qeveri nuk e kupton sigurinë kombëtare dhe aparatin e saj dhe se si në të vërtetë financohet dhe funksionon ky sektor.”
Ajo ka vijuar më tej duke thënë se ushtria nuk mund të mbahet me lëmosha.
“Ushtria kërkon një qasje serioze institucionale për financimin e saj njohuri të thellë të rëndësisë së qëndrueshmërisë së financimit. Një ushtri e fortë nuk mund të ndërtohet e as të mbahet nga “lëmosha”, është e paqëndrueshme, jo serioze, jashtë sistemit shtetëror tashmë ekzistues për të mbështetur planin zhvillimor të FSK-së, dhe një barrë tjetër e rëndë për një popullatë tashmë të varfër që mezi përballon ushqimin dhe rrymën. Mos të flasim për një mërgatë të rraskapitur me barrën e ndihmës për ne, me dekada të tëra”, citohet të ketë thënë Kabashi.
Sipas saj Kosova tashmë mbledh taksa dhe ato janë kontributi i popullit tonë për shtetin, duke sugjeruar se në këtë kohë FSK-ja duhet të zhvillojë tutje Gardën Kombëtare. Për më shumë, marrëdhëniet me partnerët strategjik janë në rrezik dhe prandaj duhet bërë më shumë në këtë drejtim./FolDrejt/
