Gazetari francez Santi Aouna, i cili njoftoi i pari largimin e Karim Benzemas në Arabinë Saudite, publikoi edhe përgjigjen e asit francez për pyetjen se pse po largohej nga Reali për në Al Ittihad, raporton Klix, përcjell Fol Drejt.
Nisur nga kjo, Benzema ishte mjaft i sinqertë në bisedën e tij me një mik të ngushtë dhe pranoi se po shkonte për para.
Edhe pse fillimisht u shkrua se Benzema do të arkëtojë 200 milionë euro për kontratën dyvjeçare, duket se kjo shifër është dyfish më e lartë dhe ai do të fitojë po aq sa Cristiano Ronaldo në radhët e Al Nassr.
“Si mund të refuzoj 400 milionë euro? tha Benzema, sipas Aouna.
Francezi pritet të zyrtarizojë lëvizjen e tij në Arabinë Saudite javën e ardhshme dhe sot do të luajë ndeshjen e fundit kundër Athletic Bilbaos në Santiago Bernabeu.
Benzema mbërriti në Madrid në vitin 2009 në moshën 21-vjeçare dhe u bë sulmuesi kryesor i klubit për më shumë se një dekadë gjatë një prej epokave më të famshme të klubit madrilen. Gjatë këtyre 14 viteve, ai fitoi 25 trofe, pesë prej të cilëve ishin Liga të Kampionëve.
Ai largohet si golashënuesi i dytë më i mirë në historinë e klubit, me një numër mbresëlënës prej 353 golash, pas Cristiano Ronaldos (450). Veç kësaj, Benzema është lojtari i huaj që ka veshur më së shumti fanellën e Real Madridit (647 paraqitje), duke siguruar kështu pozitën e pestë në renditjen e përgjithshme, përpara Raul, Casillas, Sanchis dhe Hierro. /FolDrejt/
