Mediat në Beograd raportojnë se në takimin e djeshëm ndërmjet Derek Chollet dhe Albin Kurtit është diskutuar rëndësia e formimit të menjëhershëm të Asociacionit të Komunave me Shumicë Serbe, raporton Fol Drejt.
Vetë Kryeministri Albin Kurti dje në llogarinë e tij në Twitter njoftoi se ai zhvilloi dje një bisedë telefonike me Këshilltarin e Lartë në Departamentin e Shtetit në Shteteve të Bashkuara të Amerikës (ShBA), Derek Chollet, pa specifikuar çështjen e Asociacionit në veçanti:
“Sot pata një telefonatë të mirë me Këshilltarin e Lartë në Departamentin e Shtetit në SHBA, Derek Chollet, ku diskutuam agjendën e takimit të nesërm. Theksova rëndësinë që Marrëveshja Bazë dhe Aneksi i saj duhet të zbatohen në tërësi dhe në mirëbesim. E falënderova edhe për mbështetjen e SHBA-së.”
Had a good phone call with @CounselorDOS Derek Chollet today, where we discussed the agenda for tomorrow’s meeting. I emphasized the importance that the Basic Agreement & its Annex must be implemented in its entirety and in good faith. I also thanked him for the U.S. support.
— Albin Kurti (@albinkurti) May 1, 2023
Por Chollet në njoftimin e tij në Twitter, ka thënë se ata kanë biseduar edhe për Asociacionin:
“Bisedë shumë e mirë me kryeministrin Albin Kurti për takimin e liderëve të 2 majit për normalizimin e marrëdhënieve me Serbinë përmes Dialogut të Lehtësuar nga BE-ja, rëndësinë e zbatimit të menjëhershëm të Asociacionit për Komunat me shumicë Serbe dhe partneritetin e fortë SHBA-Kosovë.”
Very good conversation with PM @albinkurti about the May 2 leaders’ meeting on normalizing relations w/ Serbia through the EU-Facilitated Dialogue, the importance of implementing the Association for Serb-majority Municipalities immediately, and strong U.S.-Kosovo partnership.
— Derek Chollet (@CounselorDOS) May 1, 2023
Mediave serbe u ka rënë në sy theksi i vendosur mbi çështjen e Asociacionit në njoftimin e Chollet, duke thënë se nga Kryeministri Kurti është kërkuar formimi i tij në mënyrë të menjëhershme.
Kryeministri Kurti do të takohet sot në Bruksel me Presidentin e Serbisë Aleksandër Vuçiq, ndërsa ndër të tjera pritet që t’u prezantohet një draft-statut i Asociacionit, i përpiluar nga i ashtuquajturi Ekip Menaxhues./FolDrejt/
