Nëpërmjet një reagimi zyrtar, Lista Serbe ka deklaruar se “nuk do të bien pre e lojës” dhe se nuk do t’i nënshtrohen “regjimit të Prishtinës zyrtare”, duke qenë se kjo e fundit po kërkon lirimin e institucioneve nga strukturat paralele, shkruan Fol Drejt.
Portali i afërt me presidentin Aleksandër Vuçiq, Pink.tv, ka përcjellë qëndrimin e Listës Serbe, e cila ka mbajtur qëndrim refuzues ndaj kërkesës së autoriteteve të Kosovës.
“Duke pasur parasysh synimin e Prishtinës që me çdo kusht të vazhdojë me përshkallëzimin e situatës në terren dhe të pushtojë objektin në Mitrovicë ku janë Zyra për Kosovë, Zyra e Drejtorisë së Fondit PIO, Kosova. Rrethi Administrativ i Mitrovicës dhe Qendra për Punë Sociale, janë të vendosura në selitë ë tyre, ndërsa dëshirojmë të njoftojmë publikisht se refuzojmë ultimatumin e regjimit në Prishtinë që të largohemi nga lokalet tona dhe kërkojmë që kjo çështje të zgjidhet në dialogun ndërmjet Beogradit dhe Prishtinës, i realizuar nën patronazhin e Bashkimit Evropian dhe në kuadër të themelimit të Bashkësisë së Komunave Serbe, siç parashihet në marrëveshjet e vitit 2013 dhe 2015” – thuhet në reagimin e Listës Serbe.
Sipas reagimit të Listës Serbe “institucionet e lartpërmendura të Republikës së Serbisë kanë vite që ofrojnë shërbime për të gjithë qytetarët pa dallim, serb dhe shqiptarë, boshnjakë, goranë, romë, turq e të tjerë, dhe se 40 familje jetojnë falë punës së persona të punësuar në këto institucione.”
Ua kujtojmë që ishte Komuna e Mitrovicës së Veriut ajo që u ka dhënë afat që deri më 8 shtator të ashtuquajturave institucione si: Zyra për Kosovën e Qeverisë së Serbisë, Drejtoria e Fondit të Sigurimit Pensional dhe Invalidor, Qarku Administrativ i Mitrovicës së Kosovës dhe Qendra për Punë Sociale nga Vushtrria të largohen nga objekti./FolDrejt/
