Besnik Bislimi ka folur sot para Komitetit për Politikë të Jashtme të Parlamentit Evropian, për takimin e mbrëmshëm Kosovë – Serbi, raporton Fol Drejt.
Ndër është përqendruar edhe te çështja e Asociacionit ndërsa ka sqaruar se:
“…e di që plani i Ahtisarit ishte bazë për shpalljen e Pavarësisë, nuk bëjnë thirrje për autonomi. Marrëveshjet e kaluara vetëm e listojnë një mekanizëm që do të mundësojë koordinimin ndërmjet komunave me shumicë serbe në formë të një asociacioni. Do të jetë një institucion joqeveritar që koordinon këtë çështje, por kurrë nuk është paraparë si një autonomi territoriale për asnjë pjesë të vendit, qofshin ato komunat në veri apo në jug.”
Zëvendëskryeministri Bislimi ka thënë se Kosova në takimin e mbrëmshëm është paraqitur si palë konstruktive, e përkushtuar në rolin e saj prosperues e stabilizues në raport me fqinjët.
“Objektivi ynë është i qartë, ne kërkojmë që të marrim statusin e kandidatit deri në fund të këtij viti, ky mund të shihet si qëllim sfidues por jemi plotësisht të angazhuar për të arritur atë”, ka thënë ndër të tjera Bislimi.
Dje në takimin e mbrëmshëm palët janë dakorduar që plani franko-gjerman, të avancojë tutje me planin e zbatimit, duke iu hapur një perspektivë të re Kosovës dhe Serbisë dhe një shans të ri për pajtim përfundimtar./FolDrejt/
