Sekretari i Shtetit i ShBA, Antony Blinken tha se ishte koha që Turqia të mbështeste aplikimin e Suedisë për anëtarësimin në NATO, duke i thënë gjithashtu Ankarasë se administrata e Biden besonte se Turqia duhet të marrë avionë luftarakë të përmirësuar F-16, raporton Klix, përcjell Fol Drejt.
Suedia dhe Finlanda fqinje kërkuan anëtarësimin në NATO pasi Rusia nisi pushtimin e saj në Ukrainë vitin e kaluar. Ndërsa Finlanda i është bashkuar që atëherë aleancës ushtarake, Suedia është ende në pritje për t’u bashkuar, pasi Hungaria dhe Turqia ende nuk e kanë ratifikuar anëtarësimin e Stokholmit.
“Nga perspektiva e Shteteve të Bashkuara, tani është koha për të finalizuar pranimin e Suedisë,” tha Blinken.
Administrata e Biden tha gjithashtu se Ankaraja duhet të marrë avionët luftarakë F-16 të përmirësuar “sa më shpejt të jetë e mundur”. Dhe ndërsa Blinken argumentoi se administrata nuk i ka lidhur dy çështjet, ai gjithashtu pranoi se disa ligjvënës amerikanë i kanë lidhur.
Presidenti i ShBA Joe Biden i lidhi në mënyrë implicite dy çështjet në një bisedë telefonike me presidentin turk Rexhep Tajip Erdogan të hënën.
Por Blinken këmbënguli se të dy çështjet ishin të ndara dhe theksoi se përfundimi i të dyjave do të forconte sigurinë evropiane.
“Të dyja janë jetike, sipas këndvështrimit tonë, për sigurinë evropiane,” tha Blinken.
Turqia ka akuzuar Suedinë se është shumë e butë ndaj grupeve që Ankaraja i konsideron terroriste. /FolDrejt/
