Shtetet e Bashkuara i kanë dhënë Moskës përgjigjen e saj me shkrim që synon të pengojë një pushtim rus të Ukrainës, njoftoi të mërkurën Sekretari i Shtetit, Antony Blinken.
Sipas CNN, përcjell Telegrafi, përgjigja iu dorëzua personalisht Ministrisë së Punëve të Jashtme ruse nga ambasadori amerikan në Rusi, John Sullivan.
“Dokumenti i shkruar që synon të adresojë shqetësimet Moska ka publikuar publikisht dhe ka përshkruar fushat ku SHBA ka thënë se sheh potencial për përparim me Rusinë – kontrollin e armëve, transparencën dhe stabilitetin”, u tha gazetarëve në Departamentin e Shtetit diplomati i lartë amerikan.
Blinken tha se përgjigja e SHBA ndaj Rusisë “përcakton një rrugë serioze diplomatike përpara nëse Rusia e zgjedh atë”, duke u thënë gazetarëve të mërkurën se ai pret të ketë një diskutim pasues me ministrin e jashtëm rus Sergey Lavrov në ditët në vijim, tani që dokumenti është marrë nga Moska.
“Dokumenti që kemi dorëzuar përfshin shqetësimet e Shteteve të Bashkuara dhe aleatëve dhe partnerëve tanë në lidhje me veprimet e Rusisë që minojnë sigurinë, një vlerësim parimor dhe pragmatik të shqetësimeve që ka ngritur Rusia dhe propozimet tona për fushat ku ne mund të jemi në gjendje të gjejmë gjuhën e përbashkët”, citohet të ketë thënë tutje Blinken.
Blinken nuk pranoi të detajojë specifikat e paraqitura në Moskë, por ai tha se përgjigja e SHBA-së përsëriti atë që SHBA dhe NATO kanë thënë publikisht – se ata do të mbështesin “politikën e dyerve të hapura” të NATO-s, duke hedhur poshtë kërkesat e Moskës që NATO të angazhohet që të mos pranojë kurrë Ukrainën.
“Nuk do të ketë asnjë ndryshim”, ka thënë tutje Blinken për mbështetjen e SHBA-së dhe NATO-s për politikën e dyerve të hapura të aleancës.
“Ne e bëjmë të qartë se ka parime thelbësore që ne jemi të përkushtuar t’i mbështesim dhe mbrojmë, duke përfshirë sovranitetin dhe integritetin territorial të Ukrainës, dhe të drejtën e shteteve për të zgjedhur marrëveshjet dhe aleancat e tyre të sigurisë”, ka shtuar ai.
Zëdhënësi i Departamentit të Shtetit, Ned Price tha të martën se SHBA ishte konsultuar ngushtë me aleatët dhe partnerët, përfshirë Ukrainën, në hartimin e përgjigjes, duke thënë në një konferencë të Departamentit të Shtetit: “Nnuk do të ketë surpriza. Nuk do të ketë surpriza për NATO-n. Nuk do të ketë surpriza për aleatët tanë evropianë. Nuk do të ketë surpriza për partnerët tanë ukrainas”.
Veç këtyre Blinken ka bërë të ditur se dokumenti i SHBA-së u nda me Kongresin dhe se ai do të informonte udhëheqësit e kongresit më vonë gjatë ditës.
Ai tha se SHBA nuk do ta publikonte dokumentin e vet publikisht, “sepse ne mendojmë se diplomacia ka shanset më të mira për të pasur sukses nëse ofrojmë hapësirë për bisedime konfidenciale”
