Zbatimi i rrugës evropiane për normalizimin e marrëdhënieve ndërmjet Kosovës dhe Serbisë tani është përgjegjësi e Beogradit dhe Prishtinës dhe Bashkimi Evropian do ta monitorojë me kujdes, tha përfaqësuesi i lartë i BE-së për politikë të jashtme dhe siguri, Josep Borell, përpara takimit të ministrave të punëve të jashtme të vendeve anëtare të BE-së në Bruksel, raportojnë mediat e huaja, përcjell Fol Drejt.
“Sa i përket Kosovës dhe Serbisë, ne zhvilluam një takim të gjatë që përfundoi me një marrëveshje që do të jetë pjesë integrale e rrugës evropiane për të dyja palët. Do të jetë pjesë e kapitullit të negociatave – kapitulli 35 në negociatat me Serbinë dhe do të përfshihet në dokumentin e normalizimit dhe në kërkesat ndaj Kosovës”, tha Borell.
“Pra tani është përgjegjësia e tyre dhe ne do të monitorojmë nga afër zbatimin. “Të dyja palët janë pajtuar dhe janë përkushtuar ta bëjnë këtë, dhe tani le të vëzhgojmë me kujdes se si do të zhvillohet”, shtoi ai.
Kujtojmë se presidenti i Serbisë, Aleksandër Vuçiq dhe kryeministri i Kosovës, Albin Kurti, të shtunën në Ohër arritën marrëveshje për zbatimin e aneksit të marrëveshjes për rrugën e normalizimit të marrëdhënieve.
Vuçiq, megjithatë, insiston se nuk ka nënshkruar asgjë dhe as nuk ka pranuar gjithçka, siç pretendojnë zyrtarët evropianë, kështu që nuk do të zbatojë gjithçka që parashihet në marrëveshje. /FolDrejt/
