BE-ja duhet të ndikojë tek Kina që të përdorë fuqinë e saj globale në një mënyrë “të përgjegjshme”, tha të enjten shefi i politikës së jashtme të bllokut, raporton Anadolu Agency, përcjell Fol Drejt.
Duke folur në Samitin Evropian të Mbrojtjes dhe Sigurisë, Josep Borrell theksoi se BE-ja është një “partner” dhe një “konkurrent” i Kinës.
“Sistemet e tyre janë rivale”, por ata gjithashtu shkëmbejnë 2.7 miliardë dollarë çdo ditë duke tregtuar shërbime dhe mallra, tha ai.
Borrell sapo prezantoi një raport për ministrat e jashtëm të BE-së mbi “riformimin” e lidhjeve të bllokut me Kinën përpara takimit të tyre jozyrtar në Stokholm të premten.
Elementi thelbësor i strategjisë së BE-së është t’i “kërkohet Kinës të veprojë me përgjegjësi si një anëtare e përhershme e Këshillit të Sigurimit të OKB-së”, pohoi ai.
Gjëja e rëndësishme është se si Kina e përdor fuqinë e saj botërore, tha Borrell.
Ai argumentoi se “miqësia e pakufizuar midis Kinës dhe Rusisë” me të vërtetë ka kufizime pasi ekonomia ruse përfaqëson 1% të prodhimit ekonomik global ndërsa Kina jep 20%.
Borrell tha se “Kina po mbështet Rusinë, por për momentin nuk po siguron armë” për luftën e saj në Ukrainë.
BE vazhdon “t’i kërkojë Kinës që të përdorë ndikimin e saj në Rusi për të ndalur luftën”, tha më tej ai.
Borrell përsëriti mbështetjen e bllokut për Ukrainën përballë agresionit rus.
Ai pohoi se lufta mund të përfundonte shpejt nëse bota e lirë ndalonte së mbështeturi Ukrainën, por gjithashtu “do të pushonte së ekzistuari si një vend i lirë dhe i pavarur”.
Ai pranoi se është qëllimi i tij më i rëndësishëm “personal” në 18 muajt e ardhshëm deri në përfundimin e mandatit të tij për të siguruar që presidenti rus Vladimir Putin “nuk mund ta fitojë këtë luftë”. /FolDrejt/
