Presidenti francez Emannuel Macron e paraqiti Bosnjën dhe Hercegovinën si një “bombë sahati” që mund të shpërthejë në çdo moment, si pasojë e kthimit të shumë familjarëve të ISIS në shtetin fragjil të Ballkanit Perëndimor. Kjo deklaratë ndodhi pikërisht në periudhën kur shumë pjesëtarë të ISIS dëbohen nga Turqia në vendet e Perëndimit, me iniciativën e presidentin Erdogan, se “Turqia nuk është hotel për shtetasit e huaj të ISIS”.
Željko Komšić, përfaqësuesi kroat i presidencës boshnjake, kërkoi menjëherë shpjegime nga ambasadori francez në Sarajevë, Guillaume Rousson, ku tha se Bosnja është e angazhuar mjaft në luftën kundër terrorizmit dhe ftoi presidentin Macron në Bosnjë që të vëzhgojë vetë situatën.
“Bosnja nuk ka problem me një numër të vogël të luftëtarëve të huaj të ISIS që janë kthyer këtu, por problemin më të madh e kanë shtete si Franca që duhet të luftojë brenda tyre, grupe të ndryshme të ideologjive ekstremiste.”
Propaganda nga Kroacia
Në fakt prej disa vitesh Kroacia mundohet të shpërndajë disa lajme për rrezikun e ekstremizmave nga shteti fqinj Bosnja, për arsye diskreditimi dhe arritjen e qëllimeve irredentiste.
Deklaratat e tilla për një “bombë me sahat” mund të kishin dalur nga kjo propagandë kroate, veçanërisht nga presidentja konservatore Kolinda Grabar-Kitarović. Por askush nuk e ka pritur nga Franca, shkruan vjenezja STANDARD, përcjell foldrejt.com.
“Për dallim nga Europa Perëndimore, në Bosnjë dhe Hercegovinë nuk ka ndodhur sulm terrorist në pesë vitet e fundit. Poashtu nuk ka sinjale për shtimin e ndikimit të ideologjive xhihadiste,” thotë eksperti i ekstremizmit Vlado Azinovic nga Universiteti i Sarajevës. “Narrativa radikale (ideologjikisht dhe financiarisht) ndikohet shpesh nga diaspora në Perëndim, duke përfshirë edhe hapësirat gjermanofone,” vijoi më tej politologu dhe historiani Azinovic, duke shtuar se me këto deklarata Macron është i këshilluar keq, por që synon thithjen e votave të francezëve islamofobë dhe kundër zgjerimit europian.
Përndryshe Bosnja është ndër vendet e para që pranoi ish shtetasit e saj që luftuan në ISIS, por edhe ndër të parat që i burgosi ata. Nga 2015 janë burgosur 24 persona.
Sipas një studimi të Grupit Soufan nga 2015 në luftërat në Siri dhe Irak kanë emigruar 3700 persona nga Franca, Gjermania, Belgjika dhe Britania e Madhe. Ish kryeministri francez Manuel Valls tha se vetëm nga Franca kanë emigruar rreth 1700 persona. Për krahasim: nga i gjithë Ballkani kanë emigruar rreth 800 persona, kurse nga Bosnja janë nga 200 deri 300./Foldrejt.com
