Brazili e ka mundur me rezultat 4-1 Korenë Jugore, duke kaluar lehtësisht në çerekfinale. Takimi i zhvilluar në kuadër të 1/8-ës së finales në Kampionatin Botëror “Katari 2022” iu ka takuar tërësisht brazilianëve të cilët e kanë dominuar ndeshjen me lojë, raste e gola, shkruan Fol Drejt.
Gëzim Olluri – Fol Drejt
Vinicius Junior e hapi serinë e golave për Brazilin në minutën e 7-të, ndërsa Neymar në minutën e 13-të nga penalltia e dyfishoi epërsinë. Në minutën e 29-të të takimit Richarlison realizoi golin e tretë pas një asistimi nga Thiago Silva. Në minutën e 36-të ishte Lucas Paqueta që e realizoi golin e katërt për pesë herë kampionët botëror. Në pjesën e dytë u zhvillua lojë më e qetë dhe Korea Jugore arriti të bëjë vetëm një gol. Ishte Seung-Ho Paik që realizoi në minutën e 76-të të përballjes dhe Brazili arriti ta ruajë rezultatin, duke fituar me rezultat 4-1.
Në takimin tjetër të ditës së sotme, Kroacia e ka fituar duelin përballë Japonisë pas penalltive. Loja e rregullt përfundoi me rezultat 1-1, kurse pas penalltive kroatët arritën fitore me rezultat 3-1. Më meritori për fitoren e Kroacisë ishte portieri Dominik Livaković që arriti të mbrojë tre penallti të japonezëve. Më 9 dhjetor në çerekfinale do të përballen Kroacia dhe Brazili në “Education City Stadion” nga ora 16:00. /FolDrejt/
