Brazili rrezikon të humbasë kontrollin e pyjeve të tij të Amazonës për krimin e organizuar dhe trafikantët e qenieve njerëzore që përdorin rajonin për të kontrabanduar drogë, paralajmëroi të mërkurën gjyqtari i Gjykatës së Lartë, Luis Roberto Barroso.
Barroso i bëri thirrje gjithashtu komunitetit ndërkombëtar të kontribuojë me fonde dhe ide për të inkurajuar zhvillimin e qëndrueshëm që do të ruante pyllin tropikal të Amazonës, më i madhi në botë, dhe do të ndihmonte 25 milionë njerëzit që jetojnë atje.
Amazona thith sasi të mëdha të gazeve serrë përgjegjëse për ngrohjen globale dhe ruajtja e tyre konsiderohet çelësi për të luftuar ndryshimet klimatike. “Ekziston një rrezik real për të humbur sovranitetin e Amazonës, jo në dobi të ndonjë vendi tjetër, por në dobi të krimit të organizuar,” tha gjykatësi i cili gjithashtu mori pjesë në bisedimet e fundit të Kombeve të Bashkuara për klimën COP27 në Egjipt (në Nëntor).
Ai vlerësoi gjithashtu se financimi ndërkombëtar nuk kërcënon sovranitetin brazilian mbi Amazonën, siç ka deklaruar presidenti i ekstremit të djathtë të Brazilit, Jair Bolsonaro.
Përkundrazi, mbështetja e huaj është e nevojshme për të ndaluar degradimin e pyjeve tropikale dhe për të ndihmuar shtetin brazilian të rivendosë ligjin dhe rendin në Amazon. “Autoritetet braziliane do të duhet të jenë shumë të përkushtuara për t’u përballur me krimet mjedisore si prerjet e paligjshme dhe minierat, shpyllëzimi, grabitja e tokës dhe vrasja e mbrojtësve të pyjeve,” tha Barroso.
Nën udhëheqjen e Bolsonaro, aktiviteti i paligjshëm është rritur në Amazon, i nxitur nga shkurtimet në mbrojtjen mjedisore dhe fondet e reduktuara për agjencitë e zbatimit.
Qeveria e Bolsonaro paralizoi gjithashtu fondin e Amazon, në të cilin Norvegjia dhe Gjermania kontribuan më shumë se 1 miliard dollarë për të mbështetur projektet e qëndrueshme në rajon.
Fondi do të rifillojë kur presidenti i sapozgjedhur Luiz Inacio Lula da Silva, i cili mundi Bolsonaron në zgjedhjet e tetorit, të marrë detyrën në janar. Lula premtoi t’i jepte fund mosndëshkimit për krimet në Amazonë./FolDrejt/
