Qeveria britanike thotë se Rusia duhet të marrë përgjegjësinë për “gjyqin e rremë” të dy britanikëve të cilët u dënuan me vdekje për luftimin kundër forcave ruse në Ukrainë
Qeveria britanike tha se Rusia duhet të marrë përgjegjësinë për “gjyqin e rremë” të dy britanikëve të cilët u dënuan me vdekje për luftime kundër forcave ruse në Ukrainë, shkruan AA, transmeton Fol Drejt.
Aiden Aslin, 28 vjeç, dhe Shaun Pinner, 48 vjeç, u dënuan së bashku me një maroken nga një gjykatë e drejtuar nga rebelët e mbështetur nga Rusia në Republikën e vetëshpallur Popullore të Donetskut, e cila nuk njihet ndërkombëtarisht.
Dy britanikët ishin anëtarë të një njësie ushtarake ukrainase të cilët u kapën në portin jugor të Mariupolit.
Ministri i qeverisë Robin Walker tha se kjo ishte “një gjykatë e paligjshme në një qeveri të rreme”, por se Britania e Madhe do të përdorë “të gjitha kanalet diplomatike për të vërtetuar se këta ishin robër lufte që duhet të trajtoheshin në përputhje me rrethanat”.
Ai tha se “Rusia duhet të marrë përgjegjësinë e saj sipas Konventës së Gjenevës, për trajtimin e të burgosurve të luftës”.
Sekretarja e Jashtme britanike Liz Truss do të flasë me homologun e saj ukrainas Dmytro Kuleba më vonë gjatë ditës së sotme rreth çështjes. Britania e Madhe nuk ka paraqitur ndonjë plan për të folur me zyrtarët rusë. /FolDrejt/
