Mbretëria e Bashkuar po përballet me grevën më të madhe të punonjësve shëndetësorë në historinë e Shërbimit Shëndetësor Kombëtar (NHS) pasi dhjetëra mijëra infermierë dhe punonjës të A&E dalin në rrugë për pagat.
Punëtorët e Shërbimit Shëndetësor Kombëtar (NHS) filluan një seri grevash në dhjetor për të kërkuar një rritje pagash në një kohë kur inflacioni është mbi 10 për qind në vend, përcjell Fol Drejt.
Kjo është hera e parë që si infermierët ashtu edhe punonjësit e urgjencës do të dalin në grevë në të njëjtën ditë, gjë që do të sjellë ndërprerje të mëdha në spitalet që tashmë janë në një situatë shumë shqetësuese.
Organi spitalor i Ofruesve të NHS i ka kërkuar publikut që të përdorë shërbimet e urgjencës “me ndjeshmëri” dhe paralajmëroi se shërbimi po i afrohet një “pikë kthese”.
“Pavarësisht masave urgjente të vendosura, grevat e kësaj jave nga sindikatat e ambulancës dhe mjekëve do të çojnë në mënyrë të pashmangshme në vonesa të mëtejshme për pacientët që tashmë përballen me pritje më të gjata për shkak të vonesave të lidhura me Covid-in”, paralajmëroi Ministri i Shëndetësisë Steve Burley.
Megjithatë, qeveria nuk duket se dëshiron të lëkundet për çështjen e pagave.
“Guvernatori i Bankës së Anglisë ka paralajmëruar se situata do të përkeqësohet vetëm nëse përpiqemi të mposhtim inflacionin me rritje të mëdha pagash dhe njerëzit nuk do të jenë më mirë”, tha Steve Barkley në një deklaratë.
Ai tha se kishte pasur “diskutime konstruktive” me sindikatat mbi pagat dhe vazhdoi t’i nxiste ata t’i jepnin fund grevave, duke thënë se ishte koha që sindikatat të fillojnë të shikojnë nga e ardhmja.
Edhe Sindikata e Infermierëve (RCN) ka bërë thirrje për grevë.
Lëvizja prek kryesisht Anglinë sepse negociatat janë duke vazhduar në Uells.
Sipas sindikatës RCN, për shkak të politikës shtrënguese që goditi rëndë Shërbimin Shëndetësor Kombëtar, paga e mjekëve ndihmës ka rënë me pothuajse 20 për qind në dhjetë vjet në terma realë. Sindikata kërkon një rritje prej rreth 19 për qind.
Punonjësit e ambulancës do të kthehen nesër në punë, por të premten do të jenë sërish në grevë.
Shefi ekzekutiv i NHS Providers Julian Hartley tha se ai e kuptonte pse stafi kishte arritur “pikën e pakthimit dhe i bëri thirrje qeverisë të ulet me sindikatat dhe të arrijë një marrëveshje”.
Rreth 88,000 ekzaminime të planifikuara tashmë janë anuluar për shkak të grevave, tha ai./FolDrejt/
