Kryeministrja e Serbisë, Ana Brnabiq, ka thënë së fundmi se Bashkimi Evropian është projekti më i madh i paqes në historinë e botës dhe se Serbia dëshiron të jetë pjesë e tij, transmeton Fol Drejt.
“Dhe në shumë aspekte, Serbia është tashmë pjesë e hapësirës unike dhe të përbashkët evropiane. BE-ja është investitori më i madh në Serbi, deri tani partneri më i rëndësishëm ekonomik dhe deri tani donatori financiar më i rëndësishëm,” tha Brnabiq, gjatë pritjes zyrtare para fillimit të “Javës së Mundësive të BE-së” e organizuar nga Delegacioni i Bashkimit Evropian në Serbi.
Brnabiq ka thënë se qëndrimet e BE-së dhe Serbisë nuk ndryshojnë, madje as për sa i përket luftës së Ukrainës.
Ajo iu ka referuar raporteve me Kosovën, duke thënë se Serbia respekton dhe mbron parimin bazë të së drejtës ndërkombëtare publike, si dhe Kartës së OKB-së, për paprekshmërinë e kufijve ndërërkombëtar për vendet sovrane.
“Kështu i qasemi edhe dialogut me Prishtinën” – ka thënë ajo, duke thënë se Serbia e synon paqen, dhe se ky është interesi më i madh i tyre.
“Dhe unë ende e shfrytëzoj rastin sot që të kërkojmë nga partnerët tanë, nga BE-ja, që të na ndihmojnë për të ruajtur paqen dhe për të siguruar që serbët në Kosovë të jetojnë pa frikë nga torturat, arrestimet, keqtrajtimet, trajtimet çnjerëzore të përditshme – për të siguruar të paktën parimet themelore të sundimit të ligjit në Kosovë”. , theksoi Brnabiq.
Ajo ka kërkuar nga partnerët ndërkombëtar që të sigurohen, kinse, serbët e rrezikuar, që të mos jetojnë nën frikë, duke kërkuar jetësimin e marrëveshjeve të Brukselit, e ndër to edhe atë për themelimin e Asociacionit të komunave me shumicë serbe.
Këto lloj deklaratash nga krerët serbë, nuk janë dhënë për të parën herë, ndërsa synojnë ta paraqesin Serbinë si një vend stabiliteti për rajonin, si një vend paqësor. Megjithatë, vetëm zhvillimet e fundit në veri të Kosovës, sipas njohësve të rrethanave, dëshmojnë krejt të kundërtën. Rrëmbimi i tre policëve shqiptarë brenda territorit të Kosovës, është cilësuar si shkelje e rëndë e sovranitetit të Kosovës. ShBA-të, Britania e Madhe dhe shumë vende të tjera, i kanë kërkuar Serbisë që t’i lirojë pa kushte policët e rrëmbyer, megjithatë, një gjë e tillë, nuk duket se është duke u jetësuar./FolDrejt/
