Burime të afërta me Lëvizjen Vetëvendosje për Fol Drejt kanë thënë se partia më e madhe parlamentare, ajo që udhëheq me institucionet kryesore në vend, po dëshiron të shkojë në zgjedhje të parakohshme parlamentare.
Një ide të tillë krerët e kësaj partie siç duket e kanë diskutuar edhe në nivel ambasadash, duke e përfshirë atë të Shteteve të Bashkuara të Amerikës (ShBA).
Arsyeja e shkuarjes në zgjedhje, sipas drejtuesve të Vetëvendosjes, nuk ka të bëjë me zhvillimet në veri të vendit, por me funksionin e legjislativit.
Ngathtësia e këtij institucioni, sipas burimeve të Fol Drejt, është shkak i mjaftueshëm që vendi të shkojë në zgjedhje të parakohshme parlamentare.
Fol Drejt ka provuar t’i kontaktojë disa nga zyrtarët e partisë në pushtet, për ta kuptuar nëse një çështje e tillë është diskutuar në të vërtetë.
“Kjo nuk është një çështje e cila është duke u diskutuar tani, zgjedhjet e parakohshme parlamentare janë një proces i gjatë i cili merr kohë më shumë” – ka thënë për Fol Drejt Mimoza Kusari Lila.
E pyetur nëse vendi shkon në zgjedhje, duke e marr për shkak mosfunksionimin e parlamentit, ajo ka përsëritur se “nuk është duke u diskutuar tani për këtë punë”, ndonëse ka vënë theksin te pakënaqësia e tyre për sa i përket punës së legjislativit.
Gjithsesi, në rrethanat në të cilat ndodhemi, edhe nëse kjo “dëshirë” veç është artikuluar në mesin e anëtarëve të kësaj partie, vështirë se mund të jetësohet.
Ua kujtojmë se Aleanca për Ardhmërinë e Kosovës (AAK), veç ka kërkuar që në parlament të provohet vota e mosbesimit, por ideja nuk është përkrahur nga partitë e tjera opozitare.
“Mocioni është veprim politik i cili realizohet kur ka vota. Ju e dini numrin e opozitës në Kuvend. Nuk jemi të interesuar për deklarime politike e beteja politike, por jemi të shqetësuar për gjendjen në veri dhe rrugën që duhet të kemi përpara me aleatët tanë. Kjo është preokupim për ne, çështje të tjera janë të rendit të dytë” – ka thënë Kryetari i Lidhjes Demokratike të Kosovës (LDK), Lumir Abdixhiku.
Në anën tjetër, bashkësia ndërkombëtare, duke i përfshirë këtu ShBA-të dhe vendet e tjera mike, po e nxitin qeverinë aktuale që të tregohet më konstruktive në lidhje me bisedimet me Serbinë. Jetësimi i marrëveshjeve të fundit të Brukselit dhe Ohrit, nga njohësit e zhvillimeve, po shihet si fund i procesit të bisedimeve. Insistimi për formimin e Asociacionit të Komunave me Shumicë Serbe, ndërkaq, mbetet pika kyçe e procesit. Pas kësaj, edhe mund të diskutohet çështja e zgjedhjeve të parakohshme, thonë njohësit e këtyre zhvillimeve./FolDrejt/
