Ish-presidenti i Perusë, Pedro Castillo, i cili u shkarkua nga Kongresi për “shpërdorim të pozitës” në vend, dërgoi letër nga burgu.
Letra e tij u publikua përmes Twitter-it ndërsa Castillo deklaroi se ishte “arrestuar me forcë” dhe akuzoi ish-zëvendëspresidenten e tij dhe tani presidenten e re Dina Boluarte si “uzurpatore”, shkruan AA, transmeton Fol Drejt.
“Po ju drejtohem në momentin më të vështirë të sundimit tim, i poshtëruar, i maltretuar dhe i rrëmbyer, por ende i përkushtuar në luftë me ju, në madhështinë e një populli sovran të mbushur me shpirtin e lavdishëm të të parëve tanë”, thuhet në letrën e Castillo-s.
Duke pretenduar se ende është president i Perusë, Castillo tha se është besnik ndaj popullit dhe qeverisë kushtetuese dhe se nuk do të heqë dorë nga detyrat e tij të larta dhe të shenjta.
Në letër, Castillo kritikoi komentet e Boluarte-s për zgjedhjet që ajo propozon të mbahen në prill të vitit 2024, duke thënë: “Publiku nuk duhet të bie në trukun e pistë të zgjedhjeve të reja”.
Duke theksuar se duhet të mblidhet Asambleja Kushtetuese, Castillo kërkoi ndalimin e abuzimit dhe lirimin e menjëhershëm të tij.
Nga ana tjetër, Prokurorja e Përgjithshme e Perusë, Patricia Benavides, paraqiti në Kongres një kërkesë kundër Castillo-s dhe 3 ministrave me akuzën e “rebelimit dhe komplotit kundër rendit kushtetues”.
Vendimi për shkarkimin e Castillo-s nga detyra u mor në seancën plenare të 7 dhjetorit me 101 vota pro, 6 kundër dhe 10 abstenime.
Arsyeja e vendimit për shkarkimin e Castillo-s nga detyra ishte “për përpjekje të uzurpimit të funksioneve publike, për rrënimin e funksionimit të pushtetit shtetëror dhe për shkelje të rendit kushtetues”.
Policia arrestoi Pedro Castillo-n pas vendimit për shpërndarjen e Kongresit dhe për formimin e qeverisë së jashtëzakonshme kombëtare.
Pas shkarkimit nga detyra në vend të tij u betua zëvendëspresidentja Dina Boluarte më 8 dhjetor si presidente e re e vendit./FolDrejt/
