Duke vlerësuar solidaritetin e sinqertë ndërkombëtar të treguar ndaj Turqisë pas tërmetit që mori jetën e më shumë se 45,000 njerëzve, Ministri i Jashtëm Cavusoglu theksoi bujarinë e vendeve më pak të zhvilluara, shkruan Klix, përcjell Fol Drejt.
Vendet më pak të zhvilluara ishin në mesin e atyre që nxituan për të ndihmuar Turqinë pas dy tërmeteve të fuqishme që goditën jugun e vendit, duke shkaktuar shkatërrim të gjerë dhe dhjetëra mijëra të vdekur, tha të dielën Ministri i Jashtëm Mevlut Cavuşoglu.
Ai theksoi se vendet më pak të zhvilluara janë solidarizuar dhe se kanë treguar se janë më të zhvilluarat dhe më bujarët në zemër.
“Vendet më pak të zhvilluara ishin ndër të parat që ofruan mbështetje dhe solidaritet gjatë ditëve më të errëta. Solidariteti juaj pas tërmetit tregoi edhe një herë se ju jeni më të zhvilluarit dhe më bujarë në zemër,” tha Cavusoglu në Konferencën e pestë të Kombeve të Bashkuara për vendet më pak të zhvilluara (LDC5) në Doha të Katarit.
Duke kujtuar tërmetin, Cavusoglu tha: “Solidariteti i sinqertë ndërkombëtar ngroh zemrat tona dhe na jep forcë”.
Kryediplomati turk theksoi gjithashtu nevojën për të mbështetur zhvillimin dhe përparimin e vendeve të cenueshme.
“Tubimi ynë sot në Doha zhvillohet në një kohë kur sistemi ndërkombëtar po përjeton transformime të shpejta. Vendet më pak të zhvilluara janë më të ndjeshmet ndaj zhvillimeve të tilla,” tha Çavusoglu në fjalimin e tij.
Duke vënë në dukje se “është përgjegjësi kolektive e komuniteteve ndërkombëtare të mbështesin zhvillimin dhe përparimin e kombeve të cenueshme”, Cavusoglu shtoi se Turqia “si një partner afatgjatë dhe i besueshëm i LDC-ve, po bën më të mirën dhe mbetet e përkushtuar”.
Cavusoglu bëri thirrje gjithashtu për “thyerjen e rretheve vicioze që e bëjnë zhvillimin edhe më të vështirë” dhe tha se “sistemi global ekonomik dhe financiar duhet të reformohet”.
“Ne duhet të gjejmë mënyra për të luftuar ndryshimet klimatike, të cilat prekin më shumë këto vende, edhe pse nuk kanë bërë asgjë për ta shkaktuar atë”, shtoi ai.
Në të njëjtën konferencë, emiri i Katarit theksoi gjithashtu nevojën për të ndihmuar sirianët “pa hezitim” dhe për të mbështetur përpjekjet e Turqisë për t’u rikuperuar nga tërmeti shkatërrues. /FolDrejt/
