Deputeti Artan Abrashi i cili vjen nga radhët e Lëvizjes Vetëvendosje, nëpërmjet një postimi në llogarinë e tij në Facebook, ka thënë se secili që flet kundër Kryeministrit Kurti në Kosovë, citohet nga mediat në Serbi, shkruan Fol Drejt.
“Çdokush që në Kosovë flet kundër Albin Kurtit, menjëherë citohet nga mediet në Serbi. Kurrë kështu e kaq shumë mediet në serbi nuk janë shërbyer nga komentatorë e analistë të Kosovës për të përshkruar njëanshëm çdo zhvillim në vend. Në mesin e personave që citohen për të sulmuar Albin Kurtin gjeni politikan aktivë pa asnjë arritje, politikan të pensionuar, ish-këshilltarë e funksionarë të ndryshëm të PLAN-it. Kritikat e tyre përplot inate pastaj përdoren si kanar i kritikave të politikanëve serbë ndaj Albin Kurtit”, ka shkruar Abrashi.
“Pastaj dalin e thonë, shihni se çka thonë vet shqiptarët për të andaj edhe ne duhet ta ashpërsojmë gjuhën kundër tij. Me të njëjtën gjuhë i flasin edhe qytetarëve serb të Kosovës të cilët vazhdimisht i kërcënojnë dhe i mbajnë të izoluar. Kur kundërshtinë ndaj Albin Kurtit e ke qëllim e jo instrument, përfundon duke u bërë vetë dhe vetëm instrument i qëllimeve kundër interesit kombëtar. Instrument për qëllimet e Serbisë kundër Qeverisë së parë të Kosovës që nuk varet nga votat e Beogradit, që nuk lejon mbajtjet e referendumit serb dhe zgjedhjeve serbe në Kosovë dhe që vendos reciprocitet”, vijoi Abrashi, duke thënë se kritikat ndaj Kurtit bien ndesh me interesat kombëtare./FolDrejt/
