Presidenti i UEFA-s, Aleksander Čeferin konfirmoi se një pjesë e ndeshjeve të Ligës së Kampionëve në të ardhmen mund të luhen në Shtetet e Bashkuara të Amerikës dhe se brenda pak vitesh finalen e këtij kompeticioni mund ta shikojnë edhe në një kontinent tjetër. Siç pritej, një njoftim i tillë u prit me kritika të shumta nga publiku evropian, shkruan Klix, përcjell Fol Drejt.
Čeferin tha se bisedimet për të ardhmen e Ligës së Kampionëve në një tjetër kontinent tashmë kanë filluar dhe se gjithçka është e mundur pas vitit 2025, pra pas finales së Ligës së Kampionëve në Mynih.
“Po, është e mundur që ta shikojmë në të ardhmen, kemi filluar të flasim për të. Finalja e Champions League do të luhet në Mynih në vitin 2025 dhe më pas do ta shohim”, tha njeriu i parë i UEFA-s dhe vazhdoi:
“Futbolli është jashtëzakonisht i popullarizuar në Shtetet e Bashkuara të Amerikës. Amerikanët janë të gatshëm të paguajnë shuma të mëdha për më të mirën e futbollit dhe përfundimisht do të ndjekin futbollin evropian ashtu siç ndjekin tifozët evropianë të basketbollit NBA.”
Ashtu siç pritej, publikut europian nuk i pëlqeu kjo deklaratë dhe komentet e shumta thonë se Čeferin fillimisht po mendon për paratë, ndonëse pretendon se nuk është kështu, por e gjitha është çështje popullarizimi.
“Shitja e të drejtave televizive në Champions League po shkon shumë mirë dhe për sa i përket SHBA-ve, kontratat e sponsorizimit po na ecin mirë. Megjithatë komercializimi i produkteve atje është krejtësisht ndryshe nga ai në Evropë, amerikanët janë shumë më të talentuar në këtë se ne. Edhe tifozët do të vazhdojnë të mendojnë se neve na interesojnë vetëm paratë, por nuk është kështu, sepse ne i kthejmë futbollit 97 për qind të të ardhurave tona”, thotë Čeferin dhe shton:
“Të ardhurat janë të mëdha, kjo është e vërtetë, dhe unë do të doja që ato të ishin edhe më të mëdha. Më shumë njerëz ndoqën finalet e Euro 2020 në SHBA sesa finalet e NBA, gjë që më tronditi vërtet, dhe 30 ndeshje në Euro u shikuan si një Super Bowl. Në këtë drejtim, mendoj se po ecim mirë.”
Čeferin së fundmi u zgjodh president i UEFA-s për herë të tretë. Ai pasoi Michel Platinin në krye të UEFA-s në vitin 2016 dhe u rizgjodh në vitin 2019. /FolDrejt/
