Agjenda për integrime evropiane e Qeverisë Kurti, ndodhet në “qorrsokak”, tha Besnik Tahiri sot në parlament.
Në seancën e sotme parlamentare, vëmendje ka marrë edhe çështja e liberalizimit të vizave.
Deputeti nga radhët e Aleancës për Ardhmërinë e Kosovës, është përplasur me zëvendëskryeministrin Besnik Bislimi, pikërisht për këtë çështje.
“Mirë që është prezent zëvendëskryeministri dhe dy ministra për të cilët i kam disa çështje ku do t’iu kërkoj edhe disa sqarime në raport me punën e qeverisë. Ajo që dua të them dhe konstatoj që agjenda e integrimit evropian e kësaj qeverie është në qorrsokak” – tha Tahiri, duke konstatuar më pas se kjo qeveri, nuk e konsideron prioritet çështjen e integrimeve evropiane.
Por i menjëhershëm ka qenë reagimi i Zëvendëskryeministrit Bislmi:
“Sa i përket dialogut, u tha këtu nga disa parafolës që ka pasur zero progres, mirëpo sigurisht që nuk i referohet as raportit për vendin, i cili e veçon marrëveshjen për targat si një marrëveshje të rëndësishme në kuadër të procesit të dialogut në Bruksel. Sa i përket integrimit deputeti Tahiri po ashtu tha se ka pasur zero progres dhe si argumentim tha që nuk ka ndodhur asnjë takim për liberalizim. Mendoj që këtu ka qenë problemi, që në vazhdimësi integrimi është barazuar me liberalizim. Integrimi nuk është liberalizim i nderuar deputet, është gjithçka tjetër… Sa i përket liberalizmit ama bash në secilin takim që kemi në vendet e BE-së, tema e liberalizimit është temë qendrore…”, tha ai.
Aktualisht deputetët po vijojnë të ngritin edhe çështje të tjera./FolDrejt/
