Po vijojnë përplasjet publike ndërmjet përfaqësuesve dhe oponentëve të televizionit Klan Kosova dhe atyre të pushtetit. Së fundi, Ministrja e Industrisë, Ndërmarrësisë dhe Tregtisë, Rozeta Hajdari, ka deklaruar se pas riverifikimit dhe pezullimit të certifikatave të biznesit për Klan Kosova SH.P.K. dhe ARTMOTION SH.P.K., MINT nuk është ndalur vetëm me këto dy raste. Menjëherë pas kësaj deklarate të ministres, ka reaguar autori i emisionit “Rubikon”, Adriatik Kelmendi, shkruan Fol Drejt.
“Përgjatë 10 ditëve gjatë këtij muaji korrik – 10.07.2023 deri më datë 19.07.2023, Komisioni ka riverifikuar 660 dosje të bizneseve të regjistruara në ARBK. Fokus i riverifikimit kanë qenë dosjet që kryesisht kanë prezantuar dokumentin personal me rubrikën vendi/shteti i lindjes, apo vendbanimi aktual me emërtime kundërkushtetuese”, ka thënë ministrja.
Hajdari ka thënë se komisioni ka konstatuar që “48 dosje të bizneseve të regjistruara në ARBK kemi emërtime kundërkushtetuese, ku në rubrikën vendi/shteti i lindjes apo vendbanimi aktual është shkruar: “Prishtinë – Kosovo Metohija, Serbia”, “Pejë – Republika e Serbisë”, “Gjilan – Serbia” “Gjakovë – Republika e Serbisë” etj.”
Duke iu referuar kësaj deklarate, Kelmendi ka thënë se pushtetin e ka kapur paniku:
“48 biznese “nuk janë në rregull”, tha, por vetëm medias ia publikuan fletërrufenë në rrjete sociale, vetëm për median paskan shkruar plot eksponentë të wannabe partisë-shtet në këto 24 orët e fundit” – ka shkruar Kelmendi, duke pyetur “pse i gjithë ky panik?”
Por Ministria e Industrisë, Ndërmarrësisë dhe Tregëtisë (MINT), iu është kundërpërgjigjur deklaratave të lëshuara nga udhëheqësit e Klan Kosovës.
Për hir të sqarimit të opinionit publik, MINT ka njoftuar se:
“Komisioni për Shqyrtimin e Ankesave për Regjistrimin e Bizneseve, pas verifikimit të të gjithë dokumentacionit në dispozicion për Klan Kosovën Sh.P.K., ka konstatuar se vendimi i shkallës së parë ishte i drejtë dhe në përputhje të plotë me ligjet në fuqi në Republikën e Kosovës. Kjo, pasi që Komisioni ka siguruar dokumentacionin aktual nga institucioni përkatës në Maqedoninë e Veriut, për “Pronarët e Vërtetë të Subjektit”, në të cilin dokumentacion ka gjetur se Kosova paraqitet përsëri si pjesë e Serbisë.
Në bazë të këtij dokumentacioni, i cili gjendet më poshtë (shih f. 1 dhe 3), Komisioni ka refuzuar ankesën e parashtruar nga pala në procedurë, duke konfirmuar të njëjtën shkelje të Kushtetutës që e ka konstatuar ARBK në shkallën e parë.
Çdo palë në procedurë gëzon të drejtën e ankimimit ndaj vendimeve të ARBK-së. Mirëpo, shkeljet e Kushtetutës nuk mund të konsiderohen kurrë si çështje “teknike”.”
Një sqarim pak më të detajuar rreth çështjes së Klan Kosovës e ka dhënë edhe deputeti i Lëvizjes Vetëvendosje Armend Muja. Ai iu është referuar datave dhe ndryshimeve që kanë ndodhur në planin e pronësisë, në këto data, për sa i përket biznesit në fjalë:
“Janë dy çështje në lidhje me Klan Kosova – (1) kërkesat ligjore për licencë mediatike OSHMA dhe (2) kërkesat ligjore për licencë biznesore.
“(1) Legjislacioni i Komisionit të Mediave i miratuar ndërmjet 2008-2010, Neni 21, paragrafi 3, i Ligjit për KPM përcakton se ‘licencat nuk mund të shfrytëzohen pa autorizim dhe pa aprovim paraprak me shkrim nga KPM’ Rregullorja e KPM për Kushtet dhe Termet e Licences së KPM, Neni 15, pika 2, përcakton se ‘për çdo ndryshim në pronësi që kap më shumë se 10% të aksioneve të interesave apo që kanë ndikim të theksuar në kontrollin e të licencuarit, kërkohet paraprakisht aprovimi me shkrim nga ana e KPM’”
Dhe:
“(2) Neglizhenca e KPM gjatë bartjes së pronësisë/KGO Media Investments nuk deklarohet nëse është regjistruar ligjshëm në Republiken e Kosovës, siç kërkohet me nenin 4 të Ligjit të KPM.”
Përndryshe, në opinionin publik qëndrimet janë dyzuar. Kundërshtarët e vendimit të qeverisë rreth rastit Klan Kosova po thonë se ky është akt që dëshmon se vendi po rrëshqet në diktaturë, e në anën tjetër mbrojtësit e vendimit po thonë se, qeveria dhe MINT, nuk po kërkon asgjë më shumë se sa respektim të ligjeve të vendit./FolDrejt/
