Milan Radojçiq dyshohet se ka mbetur i plagosur, gjatë shkëmbimit të zjarrit me Policinë e Kosovës në ngjarjen e së dielës që e tronditi opinionin vendor. Ai ishte pjesëmarrës në aksionin e veriut dhe kjo konfirmohet nëpërmjet dokumenteve të gjetura në njërën prej veturave të konfiskuara nga autoritetet vendore, shkruan Fol Drejt.
Ministri i Punëve të Brendshme Xhelal Sveçla dje para gazetarëve e konfirmoi këtë:
“Në këto materiale, po ashtu kemi gjetur dokumente të kriminelit që po ashtu është në listën e zezë të ShBA-së, Milan Radojçiq, dokumente këto që dëshmojnë lidhjen apo pjesëmarrjen e drejtpërdrejtë të tij në këtë aksion.”
Për figurën e këtij të fundit dhe lidhjet e tij me Vuçiqin ka shkruar sot portali N1Info.
“Emri i nënkryetarit të Listës Serbe, Milan Radoiçiq, u bë i njohur pas vrasjes së Oliver Ivanoviqit. Disa politikanë dhe njohës të situatës e identifikojnë atë si një njeri të fuqishëm me ndikim të madh në ngjarjet në veri të Kosovës” – shkruan ndër të tjera N1Info.
Më tutje artikulli shpalos biografinë e tij:
“Sipas Istinomerit, Milan Radoiçiq ka lindur më 21 shkurt 1978 në Gjakovë”, ndërsa “emri i tij u shfaq për herë të parë në media në vitin 2013, kur së bashku me Zvonko Veselinoviqin dhe disa të tjerë u akuzuan për keqpërdorim të ndihmave, përkatësisht keqpërdorim të pozitave zyrtare.”
Ai akuzohej se “pa pëlqimin e duhur nga Ministria e Minierave dhe Burimeve Natyrore, pa paguar dëmshpërblim për autoritetet lokale (serbe)”.
N1Info më pas i referohet një artikulli të publikuar nga Rrjeti Ballkanik i Kërkimeve (BIRN), i cili thotë se “Radoiçiq, së bashku me kumbarën e tij, siç e quan ai në deklaratat e tij, Zvonko Veselinoviqin, në vitin 2012 është akuzuar se ka nxitur Dragan Ćurçiqin, i cili ishte personi përgjegjës i kompanisë “Euro cop”, që pas skadimit të kontratës të mbajë qiranë për 32 kamionë dhe t’ua dorëzojë atyre.”
“Të dy u shpallën të pafajshëm në vitin 2015, ndërsa Gjuriçiq u dënua me tre vjet e gjysmë burg. Arsyeja kryesore pse Radoiçiq u lirua është se ai ishte në paraburgim nga shtatori 2009 deri në shkurt 2011, por në aktgjykim nuk thuhet se për çfarë akuzohej.”
“Sipas të dhënave të Agjencisë për regjistrat e bizneseve, ai zotëron 40 për qind të pronësisë në kompaninë Inkop, e cila sipas BIRN është një nga kontraktorët e Korridorit 11. 40 për qind tjetër është në pronësi të Zvonko Veselinoviqit dhe 20 për qind nga vëllai i tij Zharko Veselinoviq”.
Radojçiq sipas N1Info ishte në krye të futbollit “Trepça”, klub i serbëve lokalë, që është pjesë e të ashtuquajturës “Shoqatë e Futbollit e Kosovës”, në kuadër të sistemit paralel serb.
Ndërsa u referohet lidhjeve të tij me presidentin Aleksandër Vuçiq, e citon këtë të fundit i cili më 12 shtator 2017 kishte thënë se ai është: “një gardian i Serbisë në Kosovë dhe Metohi”.
Ndërsa Oliver Ivanoviq, lider i Iniciativës Qytetare “Liri, Demokraci dhe Drejtësi” e identifikonte Radojçiqin si një person që simbolizon një figurë me të cilën lidhet pushteti i Serbisë në veri të Kosovës. Ai atëbotë shprehej i shqetësuar për këtë fuqi të cilën Radojçiq e kishte gëzuar nga përkrahja e Vuçiqit.
“Presidenti përmendi Milan Radoiçiqin, diçka që, të them të drejtën, më shqetëson. Më shqetëson tmerrësisht që ai e merr atë si shembull të një luftëtari për mbijetesën e serbëve në Kosovë”, pat thënë Ivanoviq në një intervistë për BIRN.
Një muaj pas vrasjes së Ivanoviqit dhe pesë muaj pasi ai tha se Radoiçiq “po e mbron Serbinë”, presidenti Vuçiq pretendoi se nuk e njihte atë.
“Ka pasur një konflikt mes tij (Oliver Ivanoviq) dhe zotit Radoiçiq. Po, a është ky sekret për dikë? Meqë ra fjala për z. Radoiçiq… nuk kam folur asnjëherë me të, ndoshta ka qenë në ndonjë takim ku kam qenë unë, as në telefon, as personalisht, që ta di se po flas me të. Ndoshta ka qenë në një takim në Kosovë ku kam qenë unë”, ka thënë Vuçiq në programin “Çirilica” në televizionin “Hepi”.
Vuçiq në këtë intervistë pat thënë se Radojçiq ishte i vetëdijshëm qysh atëherë se të gjithë do t’i drejtonin gishtin pas vrasjes së Ivanoviçit, sepse konflikti mes të dyve kishte ekzistuar që nga viti 2000.
N1Info më pas shkruan se si në vitin 2017, pas fitores së Listës Serbe në zgjedhjet lokale në veri, pat festuar me Marko Gjuriqin, Goran Rakiqin dhe disa të tjerë duke e hapur “shampanjën”.
“Në qershor të vitit 2018 është emëruar nënkryetar i Listës Serbe.
Ai mori pjesë në takimin e presidentit Vuçiq dhe serbëve nga Kosova në Klubin e Deputetëve në Beograd më 22 nëntor 2018. Sipas mediave ai ishte ulur në rreshtin e parë, pikërisht pranë kryetarit të Listës Serbe, Goran Rakiq.
Një ditë më vonë, më 23 nëntor, njësia speciale e Kosovës ROSU arrestoi katër persona në veri të Kosovës në lidhje me vrasjen e Ivanoviqit dhe, siç raportojnë mediat, po kërkonin edhe Radoiçiqin, i cili nuk u gjet në banesën e tij.”
Radojçiq sipas informacioneve ende të pakonfirmuara, ndodhet jashtë territorit të Kosovës, ndërsa dyshohet se ka mbetur i plagosur. Për këtë kanë raportuar disa nga mediat e rajonit./FolDrejt/
