Gjenerali amerikan Mark Milley ka thënë se Ukraina po bënë “përparim të qëndrueshëm” në një kundërsulm që do të marrë kohë dhe do të ketë një “kosto të lartë”, shkruan Al Jazeera, transmeton Fol Drejt.
Zyrtarë të lartë ushtarakë amerikanë thanë se Ukraina përballet me një luftë të ashpër në kundërsulmin e vazhdueshëm kundër forcave ruse në kuadër të një fushate për të rikthyer territorin, e cila ka të ngjarë të vijë “me një kosto të lartë”.
Vlerësimi i SHBA-së për kundërsulmin e Kievit erdhi pasi luftëtarët çeçenë thanë se ishin vendosur në rajonin rus të Belgorodit në kufi me Ukrainën për t’i parandaluar sulmet nga grupet partizane ruse pro-ukrainase, ndërsa zyrtarët ushtarakë ukrainas të enjten raportuan përparime përgjatë vijës së frontit në disa lokacione.
“Ukraina ka filluar sulmin e saj dhe ata po bëjnë përparim të qëndrueshëm. Kjo është një luftë shumë e vështirë. Është një luftë shumë e dhunshme dhe ka të ngjarë të marrë një kohë të konsiderueshme me një kosto të lartë”, tha të enjten në selinë e NATO-s në Bruksel, gjenerali i ushtrisë amerikane Mark Milley, kryetar i Shtabit të Përbashkët.
Milley, duke folur pas një takimi të Grupit të Kontaktit të udhëhequr nga Shtetet e Bashkuara të Amerikës (ShBA), ku rreth 50 vende japin ndihmë ushtarake për Ukrainën, tha se ishte shumë herët “për të bërë ndonjë vlerësim” se sa kohë mund të zgjasë kundërofensiva ukrainase.
Sekretari amerikan i Mbrojtjes Lloyd Austin tha në takim se Kievit i duhej mbështetje afatshkurtër dhe afatgjatë pasi lufta ishte një “maratonë, jo një sprint” dhe Ukraina kishte nevojë për më shumë armë.
Austin tha gjithashtu se Ukraina kishte ende shumë fuqi zjarri për të kryer kundërofensivë, pavarësisht humbjeve fillestare të shkaktuara nga Rusia.
Moska ka shfaqur pamjet video që tregojnë tanket gjermane Leopard dhe automjetet luftarake Bradley të dhuruara nga SHBA-të, të cilat ajo pretendon se janë kapur në fillim të përpjekjeve të Ukrainës për të rikthyer territorin nga Rusia.
“Unë mendoj se rusët kanë shfaqur të njëjtat automjete rreth 1000 herë nga 10 kënde të ndryshme,” tha Austin për videoklipet. “Por sinqerisht, ukrainasit kanë ende shumë aftësi e fuqi luftarake,” tha ai.
“Kjo është një luftë, kështu që ne e dimë se do të ketë dëme në betejë nga të dyja palët” dhe më e rëndësishme ishte aftësia e Kievit për të riparuar pajisjet e dëmtuara, tha Austin.
“Kjo do të vazhdojë të jetë një luftë e ashpër siç e parashikojmë dhe besoj se elementi që bën më të mirën në aspektin e qëndrueshmërisë ndoshta do të ketë avantazhin në fund të ditës,” shtoi ai.
Kundërofensiva ukrainase është në fazat e saj të hershme dhe ekspertët ushtarakë thonë se betejat vendimtare janë ende përpara.
Ukraina ka kapur të paktën shtatë vendbanime dhe ka marrë 100 kilometra katrorë (38 milje katror) territor në dy shtytje të mëdha në jug deri më tani, tha të enjten gjenerali i brigadës së Ukrainës Oleksii Hromov.
“Ne jemi të gatshëm të vazhdojmë të luftojmë për të çliruar territorin tonë edhe me duar të zhveshura”, tha ai. Ushtria e Ukrainës në frontin jugor kishte përparuar deri në 7 km (4.4 milje) në zonën përgjatë Mokry Yali, si dhe deri në 3 km (1.8 milje) në një aks tjetër më në perëndim pranë fshatit Mala Tokmachka, thanë zyrtarët ushtarakë ukrainas.
“Njësitë tona po përparojnë përballë epërsisë së aviacionit dhe artilerisë së armikut, duke zhvilluar luftime të ashpra”, tha për televizionin ukrainas Valeriy Shershen, një zëdhënës i sektorit ushtarak Tavria të Ukrainës jugore. Përparime në lindje rreth qytetit të rrënuar të Bakhmut, të cilin ushtria ruse e pushtoi muajin e kaluar, u raportuan gjithashtu.
Por testi i madh i ofensivës së Ukrainës është ende përpara, pasi trupat ukrainase nuk kanë arritur ende në fortifikimet më të rënda mbrojtëse ruse, të cilat janë larguar nga vija e frontit. Besohet se Kievi ka përgatitur një forcë sulmi prej rreth 12 brigadash me mijëra ushtarë secila, shumica duke përdorur automjete të blinduara perëndimore të sapoardhura.
Putin pretendon se forcat ruse po e ndalojnë kundërsulmin e Ukrainës
Instituti për Studimin e Luftës (ISW), me bazë në Uashington, DC, tha të premten se operacionet aktuale nga forcat ukrainase “po vendosin kushtet për objektiva më të gjera kundërofensive të Ukrainës që nuk janë menjëherë të qarta”.
Luftimet aktuale “prandaj përfaqësojnë fazën fillestare të një kundërofensivë të vazhdueshme”, tha ISW.
Presidenti rus Vladimir Putin këmbënguli këtë javë se forcat ruse po u shkaktonin 10 herë më shumë viktima ukrainasve sesa po duronin dhe se ofensiva e Kievit kishte dështuar.
Sundimtari i Çeçenisë Ramzan Kadyrov tha gjithashtu të enjten se luftëtarët e batalionit “Zapad-Akhmat” ishin vendosur në rajonin Belgorod të Rusisë pranë vendit të një sulmi ndërkufitar në maj nga luftëtarët pro-ukrainas rusishtfolës.
“Banorët e territoreve ngjitur me kufirin me Ukrainën mund të jenë të qetë… Kushdo që shkel kufijtë tanë do të marrë një përgjigje rrufe”, tha Kadyrov në një postim në aplikacionin e mesazheve Telegram./FolDrejt/
