Kina dhe Tajvani i kanë acaruar raportet tash e një kohë, ndërsa tensioni ndërmjet tyre po vjen duke u rritur, shkruan Fol Drejt.
Sipas raportimeve të mediave të huaja, Tajvani po i bënë gati strehimoret, për t’i përballuar një sulmi të befasishëm kinez. Kina e konsideron Tajvanin territorin e saj dhe ka rritur praninë ushtarake në ajër dhe det përreth ishullit.
Nga ana tjetër, Tajvani është i përkushtuar për të mbrojtur territorin e vet dhe e ka bërë prioritet forcimin e mbrojtjes duke kryer rregullisht stërvitje ushtarake dhe civile.
Përgatitjet përfshijnë strehimoret ku qytetarët mund të strehohen në rast të një sulmi raketor nga Kina, jo në bunkerë të ndërtuar me qëllim, por në hapësira nëntokësore si parkingje, hekurudhë nëntokësore dhe qendra tregtare nëntokësore, transmeton Fol Drejt.
Kryeqyteti i Taipeit ka më shumë se 4,600 strehimore të tilla që mund të strehojnë rreth 12 milionë njerëz, më shumë se katërfishi i popullsisë së tij.
18-vjeçarja Harmony Wu u befasua kur mësoi se një qendër tregtare nëntokësore, ku ajo dhe të rinjtë e tjerë kohët e fundit po provonin një kërcim, do të kthehej në një strehë për sulm ajror në rast lufte.
“Të kesh strehimore është e domosdoshme. Ne nuk e dimë se kur mund të ndodhë lufta dhe këto janë për sigurinë tonë. Lufta është e egër. Nuk e kemi përjetuar, kështu që nuk jemi të përgatitur”, thotë Vu.
