Presidenti i Rusisë Vladimir Putin ka uruar Presidentin e Serbisë Aleksandër Vuçiq me rastin e Ditës Kombëtare duke i thënë se “Serbia është një partner i rëndësishëm dhe i besueshëm i Rusisë!”, shkruan Fol Drejt.
Ndërsa Perëndimi po përpiqet që ta zbeh ndikimin e Rusisë në Serbi, kjo e para po çon sinjale se ende e llogaritë atë si partner të besueshëm.
Sipas mediave serbe, Ambasadori i Federatës Ruse Aleksandar Bocan-Kharchenko i ka dorëzuar presidentit serb Aleksandar Vuçiq një mesazh urimi nga presidenti rus Vladimir Putin me rastin e Ditës së Shtetësisë, ku thekson se ai mbështet përpjekjet e Serbisë që synojnë mbrojtjen e integritetit territorial të vendit dhe zgjidhjen e çështjes së Kosovës.
“Serbia është një partner i rëndësishëm dhe i besueshëm i Rusisë. Ne vlerësojmë shumë kursin e balancuar të politikës së jashtme që Beogradi zbaton në rrethanat aktuale komplekse ndërkombëtare. Ne mbështesim përpjekjet tuaja që synojnë mbrojtjen e integritetit territorial të vendit dhe zgjidhjen e çështjes së Kosovës”, ka shkruar Putin.
“Jam i bindur se zhvillimi i mëtejshëm i partneritetit strategjik ruso-serb korrespondon plotësisht me interesat e kombeve tona vëllezër. Ju uroj sinqerisht shëndet dhe suksese, dhe mirëqenie e begati të gjithë qytetarëve të Serbisë”, thuhet në urimin e presidentit rus.
Sretenja festohet si festë kombëtare e Serbisë, sepse më 15 shkurt 1804 filloi kryengritja e parë serbe dhe filloi lufta për çlirim nga osmanët./FolDrejt/
