Departamenti Amerikan i Shtetit (DASh) ka publikuar raportin vjetor në lidhje me gjendjen e të drejtave të njeriu në Kosovë, ku ndër të tjera vihet theksi te korrupsioni dhe mostransparenca e institucioneve të shtetit, shkruan Fol Drejt.
Sipas raportit për vitin 2022 të DASh-it për Kosovën, kanë qenë disa raste të raportimit të korrupsionit qeveritar, ku disa “zyrtarë ndonjëherë janë përfshirë në praktika korruptive, pa u ndëshkuar”, me ç’rast kjo nënkupton mungesën e mbikëqyrjes efektive gjyqësore dhe brishtësisë për zbatim të ligjit.
Skadimi i parashkrimit të rasteve mbetet një ndër “teknikat” nëpërmjet së cilave kanë shpëtuar plot gjyqtarë, vëren raporti. Në këtë kuptim, “në dhjetor të vitit 2021, Instituti i Kosovës për Drejtësi i ka identifikuar 11 raste të korrupsionit që kanë rrezikuar parashkrim; në janar shtatë nga këto raste kanë skaduar për shkak të parashkrimit”.
Por ajo që ka lënë përshtypje në këtë raport, është se ai nuk e ka shmangur një ndër skandalet më të mëdha të kohëve të fundit, për të cilin shtyllat e drejtësisë, ende nuk kanë përgjigje. Fjala është për rastin e aktivistit Astrit Deharit, mostrat e të cilit u zhdukën së voni, pa gjurmë.
“Hetimi për vdekjen e aktivistit të Partisë Vetëvendosje në vitin 2016, Astrit Dehari, ka mbetur në vazhdim. Dehari është arrestuar me dyshimin për përfshirje në një sulm në parlament. Autoritetet hetuan nëse Dehari u vetëvra, ndërsa anëtarët e familjes së tij dhe përfaqësuesit e Partisë Vetëvendosje pretenduan se ai ishte vrarë për shkak të aktivitetit të tij politik”, thuhet në raportin e DASh.
Raporti e përmend edhe zhdukjen e mostrave të gjakut dhe urinës.
“Në gusht, familja e Deharit pohoi se kishte prova se Dehari ishte sulmuar para vdekjes së tij dhe kërkuan zëvendësimin e prokurorit kryesor. Në shtator, një raport i Inspektoratit të Ministrisë së Drejtësisë zbuloi se zyrtarët kishin qasje të pahijshme dhe kishin ndarë regjistrimet e kamerave nga Qendra e Paraburgimit në Prizren, duke shkelur kërkesat për mbrojtjen e të dhënave. Si kundërpërgjigje, në shtator qeveria suspendoi ish-drejtorin e Departamentit për Operacione, Siguri dhe Transport të të Paraburgosurve, ish-drejtorin e Qendrës së Paraburgimit në Prizren dhe kryeinspektorin e Inspektoratit të Drejtësisë. Në dhjetor, ministri i drejtësisë njoftoi se mostrat e gjakut dhe urinës së Deharit ishin zhdukur nga Laboratori i Mjekësisë Ligjore në Prishtinë. Më pas, Ministria e Drejtësisë pezulloi katër zyrtarë të Institutit të Mjekësisë Ligjore, përfshirë zëvendësdrejtorin”, thuhet në pjesën për Deharin.
Raporti nuk ka qenë aspak i “butë” as me segmente të tjera të drejtësisë, duke vënë në pah problemet si korrupsioni, nepotizmi dhe mungesa e transparencës, dukuri këto që e zvetënojnë punën e sistemit të drejtësisë në Kosovë./FolDrejt/
