I dërguari special i Bashkimit Evropian për dialogun ndërmjet Serbisë dhe Kosovës, Miroslav Lajçak, pas takimit të djeshëm në Bruksel me krerët e ekipeve negociatore tha se “diskutimet do të vazhdojnë”, duke paralajmëruar takime të tjera të radhës, deri në arritjen e rezultateve të cilat synohen, shkruan Fol Drejt.
“Sot kam biseduar me shefat e ekipeve negociatore të Kosovës dhe Serbisë, Besnik Bislimi dhe Petar Petkoviq, në një raund të ri të dialogut. Ne diskutuam se si të avancojmë në zbatimin e marrëveshjes së 27 shkurtit, me qëllim të qartësimit të çështjeve të hapura, ka shkruar Lajçak në Twitter.
I hosted the Chief negotiators of Kosovo @BislimiBesnik and Serbia @PetkovicPetar for another round of Dialogue meetings in Brussels. We discussed the way forward on the implementation of the 27 February Agreement and aimed to clarify open questions. Discussions will continue. pic.twitter.com/QjtHgeeBDF
— Miroslav Lajčák (@MiroslavLajcak) May 15, 2023
Pas përfundimit të takimeve, i pyetur nga gazetarët, Zëvendëskryeministri Besnik Bislimi tha se “as nuk është dashur të priten sot. Është fillim i diskutimeve në mënyrë që ta kemi të qartë se ku ndodhemi me procesin dhe ku duam të shkojmë, por nuk është që kemi pritur sot të përfundojmë ndonjë nga proceset.”
Më tutje Bislimi ka thënë se në takim është diskutuar çdo gjë “që ka të bëjë me zbatimin e Marrëveshjes Bazike të 27 shkurtit. Sekuencimi për ne ka qenë pjesa qendrore. Ne kemi patur një propozim të z. Lajcak, ku kemi patur shumë vërejtje tona. Kemi bërë propozimet në këtë draft-dokument të z. Lajcak ku kemi zgjeruar domeinin dhe kemi dashur të sigurohemi që secili nen i Marrëveshjes Bazike është i përfaqësuar në aktivitetin e zbatimin e tij. Pala serbe nuk ka dërgu ndonjë propozim por ka thënë se ne na intereson vetëm pjesa e Asociacionit e pastaj do të flasim për pjesën tjetër. Mirëpo nuk ka patur gatishmëri nga pala serbe që sot të diskutohet në mënyrë që bashkarisht të dilet me një plan të zbatimit.”
Në anën tjetër, sipas raportimeve të mediave serbe kryenegociatori serb Petar Petkoviq deklaroi se pala prishtinase është duke ikur nga çështja e të pagjeturve dhe formimi i Asociacionit, dhe se kur ka bërë propozimin për zgjidhjen e targave, përfaqësuesi i Prishtinës nuk ka dashur ta diskutojë./FolDrejt/
