Po vijon të komentohet takimi i së hënës ndërmjet Kosovës dhe Serbisë në Bruksel. Mediat serbe spekulojnë se po qe se Aleksandër Vuçiq do ta nënshkruan marrëveshjen për Kosovën, atëherë atë e pret një shpërblim i madh nga Perëndimi, shkruan Fol Drejt.
Vetë Vuçiq sipas N1Info e ka pranuar se pritet që “diçka” të nënshkruhet deri më 24 mars. Kjo do ta pengonte Perëndimin të përdorte “shkopin”, në rast se palët sillen në mënyrë konstruktive. Meqenëse Serbia pranoi propozimin e partnerëve perëndimorë, Beogradi tani po pret një “karotë” ose një shpërblim. Mund të jenë investime nga Mercedes ose përshpejtim në rrugën drejt anëtarësimit të plotë në Bashkimin Evropian.
Partnerët perëndimorë vlerësuan procesin e dialogut dhe bënë thirrje për përshpejtim shtesë për normalizimin e plotë të marrëdhënieve, ndërsa palët u lavdëruan për sjellje konstruktive, ndërsa u nxitën që të përshpejtojnë në “përkthimin” e marrëveshjes në praktikë.
Për publikun dhe analistët serbë, kjo është vetëm një vazhdimësi e “gatimit të bretkosës”, që herët a vonë do të rezultojë në një marrëveshje mes dy palëve. Nëse kjo ndodh, Beogradi pret një shpërblim që ishte një lloj “kompensimi” për gëlltitjen e bretkosës.
Ardhja e Mercedesit në Serbi dhe një investim 2.7 miliardë eurosh
Sipas portalit Nova.rs, presidenti i Serbisë, Aleksandar Vuçiq, në fillim të dhjetorit ka zhvilluar një takim në Bruksel me përfaqësues të Mercedesit, Rio Tinto dhe Bankës Evropiane për Rindërtim dhe Zhvillim, ndërsa bëhet fjalë për një investim të madh i cili duhet të mbërrijë në Serbi.
Sipas informacioneve jozyrtare të siguruara nga portali Nova.rs, kjo marrëveshje që do të lidhet nga Qeveria e Serbisë kap vlerën e rreth 2.7 miliardë eurove.
Sipas burimeve të portalit Nova.rs, në takimin e dhjetorit është rënë dakord që kontrata të nënshkruhet në fund të shkurtit dhe publiku të marrë të gjitha informacionet për investimin në muajin mars. Siç u tha, Serbia duhet të marrë një fabrikë të makinave elektrike, dhe ky investim duhet të jetë një nga të ashtuquajturat “Karota” për Serbinë nëse pranon propozimin franko-gjerman për Kosovën dhe harmonizon politikën e saj të jashtme me Bashkimin Evropian (BE)./FolDrejt/
