Evropa po ballafaqohet me temperatura të larta rekord ndërsa vazhdojnë zjarret në vende si Francë, Spanjë, Portugali dhe Britani të Madhe.
Evropa po ballafaqohet me temperatura të larta rekord ndërsa vazhdojnë zjarret në vende si Francë, Spanjë, Portugali dhe Britani të Madhe, shkruan AA, transmeton Fol Drejt.
Sipas lajmeve të mediave ndërkombëtare, Spanja po lufton me 38 zjarre, 21 prej të cilave janë në gjendje alarmante.
Flakët vazhdojnë të përhapen pa u ngadalësuar në zjarrin që nisi së fundmi në provincën e Zamora-s ku humbën jetën 2 persona.
Prej fillimit të verës, 70 mijë hektarë tokë në vend janë bërë hi ndërsa që nga fillimi i vitit më shumë se 150 mijë hektarë tokë janë shkatërruar nga zjarret.
Në zonat ku ekipet e zjarrfikësve nuk mund të arrijnë, njerëzit përpiqen të shuajnë zjarrin duke rrezikuar jetën e tyre për të shpëtuar shtëpitë e tyre nga flakët.
Për shkak të përhapjes së tymit të madh në rajon, disa vendbanime janë evakuuar kundër helmimit nga tymi.
Tufa e kuajve “të çmuar” në Barcelonë është transferuar në vend të sigurt për shkak të rrezikut nga zjarri. Thuhet se në vend është përjetuar vera më e rëndë në 15 vitet e fundit për shkak të zjarreve.
Rreth 25 fshatra u detyruan të evakuohen për shkak të zjarreve në rajon.
– Në Portugali vazhdon rreziku i lartë i zjarrit
Sipas të dhënave nga Instituti Portugez Detar dhe Atmosferik (IPMA), vendi ka një “rrezik të lartë zjarri”.
Në veri të vendit prej 3 ditësh ka zjarre, ku më shumë se 80 bashki në 10 zona përballen me rrezikun maksimal nga zjarret në zonat rurale. Mijëra vende u shkatërruan nga zjarret në të cilat ndërhynë mijëra zjarrfikës.
Edhe pse thuhet se zjarri është nën kontroll, thatësira po përjetohet në 80 për qind të territorit të vendit, ku temperatura në disa rajone ka shkuar mbi 40 gradë Celsius.
Qindra vendbanime janë nën kërcënimin e flakëve për shkak të 13 zjarreve që po ndodhin aktualisht në Portugali.
– Në Britani u dogjën 41 shtëpi
Të paktën 41 shtëpi janë djegur nga zjarret në 10 pjesë të ndryshme të Londrës për shkak të nxehtit ekstrem.
Sipas “Sky News”, kreu i Bashkisë së Londrës, Sadiq Khan tha se 41 shtëpi u dogjën për shkak të zjarreve në pjesë të ndryshme të qytetit. Khan njoftoi se 16 zjarrfikës u plagosën gjatë përpjekjeve për të shuar zjarrin gjatë gjithë natës.
Në deklaratën e shërbimeve shëndetësore britanike, thuhet se në linjën telefonike të ambulancës janë bërë 350 thirrje në ditë normale, mesatarisht 500 në ditë të ngarkuar ndërsa dje janë bërë gjithsej 2.600 thirrje.
Brigada e Zjarrfikësve të Londrës (LFB) dje shpalli “emergjencë”, duke deklaruar se po përballet me një situatë të paprecedentë. LFB deklaroi se vazhdon ndërhyrja e ekipeve për kontrollin e zjarreve.
Zëvendësdrejtori i Brigadës së Zjarrfikësve në Londër, Patrick Goulbourne tha se në Londër është regjistruar temperatura më e lartë e të gjitha kohërave. Sipas tij, Londra po përballet me “sfida të papara deri më tani”.
Hekurudhat britanike (Network Rail) dje njoftuan se janë anuluar të gjitha udhëtimet nga lagjja Euston në Londër.
Në aeroportin e Lutonit në qytet ishte e mbyllur një pistë për shkak të motit jashtëzakonisht të nxehtë. Në disa zona të qytetit shinat e trenit ishin deformuar nga i nxehti dhe se nuk mund të bëheshin disa udhëtime./FolDrejt/
