Nënkryetarja e Partisë Demokratike të Kosovës, Vlora Çitaku ka kritikuar institucionet e Kosovës, të cilat sipas saj nuk po punojnë në mbrojtjen e luftës së Ushtrisë Çlirimtare të Kosovës.
Me këtë rast, Çitaku tha se ish-krerët e UÇK-së të cilët po gjykohen në Hagë, nuk kanë nevojë për vizita.
“Kemi parë shumë pak përpjekje institucionale për të mbrojtur të vërtetën dhe luftën e UÇK-së. Ushtarët e UÇK-së në Hagë nuk kanë nevojë për vizita, për të parë a kanë bukë, ose kafe për të pirë. Për këto çështje i kanë familjarët. Institucionet kanë nevojë që të shihet një angazhim serioz për të mbrojtur të vërtetën dhe luftën e UÇK-së” tha nënkryetarja e PDK-së, në emisionin Frontal të T7.
Përkundrazi, sipas Çitakut, përfaqësuesit e institucioneve të Kosovës, po tentojnë të ndryshojnë historinë.
