Departamenti Amerikan i Thesarit, në kuadër të Zyrës për Kontrollin e Pasurive të Huaja, ka vendosur sanksione për anëtarin e Presidencës së Bosnje dhe Hercegovinës, Millorad Dodik, me arsyetimin për aktivitete korruptive dhe kërcënime të vazhdueshme ndaj stabilitetit dhe integritetit territorial të Bosnje dhe Hercegovinës.
Departamenti amerikan i Thesarit, në kuadër të Zyrës për Kontrollin e Pasurive të Huaja, këtë të mërkurë ka vendosur sanksione ndaj anëtarit të Presidencës së Bosnje dhe Hercegovinës, Millorad Dodik.
Sipas këtij departamenti, kjo po bëhet me arsyetimin për kërcënime të vazhdueshme ndaj stabilitetit të territorit të Bosnje dhe Hercevoginës, dhe për aktivitete korruptive të tij.
Sanksionet, sipas Departamentit amerikan të Thesarit, përfshijnë bllokimin e të gjitha pronave dhe interesat të cilat janë në pronësi të Dodik e që janë në Shtetet e Bashkuara të Amerikës, të cilat gjithashtu duhet të raportohen në OFAC.
“Ndalimet përfshijnë dhënien e çdo kontributi ose ofrimin e fondeve, mallrave ose shërbimeve nga, për ose në dobi të çdo personi të bllokuar, ose marrjen e ndonjë kontributi ose ofrimin e fondeve, mallrave ose shërbimeve nga çdo person i tillë”, thuhet në njoftimin e Departamentit amerikan të Thesarit, transmeton Klankosova.tv.
Më tej, ky departament përmend edhe një televizion, që sipas tyre, është në pronësi private nga një kompani e lidhur ngushtë me familjen e Millorad Dodik.
Bëhet fjalë për televizionin “Alternativna Televizija (ATV)”, me bazë në Banja Llukë në Republika Srpska në Bosnje dhe Hercegovinë, ku sipas Departamentit Amerikan të Thesarit, Dodik ushtron kontroll personal mbi ATV-në në prapaskenë, duke kërkuar, sipas tyre, miratimin personal për stroiet televizive që lidhen me tema të ndjeshme politike.
Sipas Departamentit amerikan të Thesarit, Dodik e ka blerë ATV-në, për të çuar përpara qëllimshëm agjendën e tij, e cila sipas tyre, përfshin përpjekjet e tij për të denigruar figura të tjera politike, për të përmirësuar imazhin e tij publik dhe për të avancuar qëllimet e tij personale dhe politike.
“Dodik, u ka dhënë kontrata të ATV-së, direkt anëtarëve të familjes së tij, të cilat i ka përdorur si një rrugë tjetër për korrupsion. Ai ka derdhur para direkt nga kompanitë publike në ATV për qëllime korruptive. Dodik ka rritur ndjeshëm fondet për ATV vitet e fundit dhe është angazhuar në fushata keqdashëse të ndikimit të mediave sociale përmes ATV për të publikuar përmbajtje që avancojnë qëllimet e tij politike dhe personale”, thuhet në njoftimin e Departamentit amerikan të Thesarit.
