I dërguari special i Bashkimit Evropian (BE), për bisedimet Kosovë – Serbi Miroslav Lajçak realizoi javën që e lamë pas përgjatë një qëndrimi dy ditor në Prishtinë, realizoi një sërë takimesh me krerë të lartë shtetëror dhe faktorë të tjerë politikë të rëndësishëm, shkruan Fol Drejt.
Pas takimeve në Prishtinë, Lajçak u shpreh se “janë përmbushur pritjet e tij”, duke lënë të nënkuptohet se gjithçka po shkon sipas asaj që BE e ka planifikuar.
Nëpërmjet llogarisë së saj zyrtare në Twitter, Presidentja e Kosovës Vjosa Osmani edhe një herë “rikonfirmoj angazhimin aktiv të Kosovës me partnerët për një marrëveshje që është në përputhje me Kushtetutën tonë dhe që do të kontribuojë në paqen e qëndrueshme për rajonin.”
Tonin entuziast për një përmbyllje të mundshme të kapitullit në bisedimet me Serbinë, ia dha edhe Kryeministri Albin Kurti. Sikurse presidentja, edhe ai pas takimit u shpreh se pala kosovare do të sillet në mënyrë konstruktive në raport me këtë fazë të procesit:
“…konfirmoj qasjen tonë të hapur dhe konstruktive për negocimin e aneksit të propozimit të BE-së për Marrëveshjen Themelore. Besoj se BE-ja mund të kontribuojë për ta bërë 18 marsin një ditë të suksesshme për demokracinë në Evropë dhe sigurinë në rajon.”
Nga ana tjetër, Presidenti i Serbisë Aleksandër Vuçiq sot citohet të ketë thënë se në takim me Lajçakun “do të flasim për atë që mund të bëjmë, por jo për atë që ëndërrojmë”, duke mos dhënë shumë shpresë se mund të arrihet shumë. Sipas Vuçiqit, “nuk do të ketë njohje as de facto dhe as de jure”, të pavarësisë së Kosovës. Ai ka pranuar se do të udhëtoj për në Ohër, por ende nuk e ka të qartë “se për çfarë të flitet atje”.
“Nëse dikush nuk është gati të flasë, e lëre më ta zbatojë marrëveshjen për Asociacionin, nuk e di se çfarë kuptimi ka. Por këtu, më lejoni të them asgjë më shumë se kaq” – ka vijuar më tej Vuçiq, duke u shfaqur i rezervuar para takimit.
Përndryshe, komuniteti vendor e ndërkombëtar po shpreson që në takimin e Ohrit i cili do të mbahet më 18 mars ndërmjet kryeministrit të Kosovës, Albin Kurti dhe presidentit të Serbisë, Aleksandar Vuçiq, të arrihet ujdi për planin e zbatimit të propozimit evropian.
Jörn Rohde, ambasador i Gjermanisë në Kosovë, u ka bërë thirrje palëve që të jenë të vëmendshme dhe që mos ta humbasin shansin.
“Marrëveshja mund të arrihet. Kosova do të përfitojë shumë. Kosovës i duhet të zbatojë obligimet e saj dhe të ofrojë Asociacionin e Komunave me Shumicë Serbe menjëherë. Apeli im për Kosovën dhe për Serbinë, është për bisedimet e ardhshme në Ohër: Mos e humbni autobusin”, shkroi në Twitter ambasadori gjerman, duke vazhduar argumentimin, se marrëveshja do të përshpejtonte integrimin euro-atlantik dhe është “shans historik për rrugën e normalizimit të plotë dhe njohjen reciproke” – citon DW, përcjell Fol Drejt.
Edhe Raportuesja për Kosovën në Parlamentin Evropian Viola Von Cramon, e komentoi shkrimin e ambasadorit gjerman duke thënë se “arritja e një marrëveshjeje do të ishte një hap i madh drejt integrimit evropian për të dy vendet. Shpresoj shumë që do të shohim të dyja nënshkrimet në marrëveshje në fund të javës në Ohër. Do të ishte një hap i madh drejt integrimit evropian për të dy vendet.”
Ndryshe prej atmosferës optimiste që mbretëron në Kosovë, në Serbi ka pasur zëra se Vuçiq mund ta braktisë procesin në momentin e fundit. Nuk do të ishte çudi që sipas tyre, ai të hiqte dorë nga gjithçka në momentet e fundit, duke u shfaqur besnik para elektoratit të tij të cilit i ka premtuar prej kohësh se do ta mbrojë Kosovën me çfarëdo mjeti dhe çfarëdo rrethane.
Mbetet të shihet nëse ai do të pranojë ta “dorëzojë” Kosovën, ashtu siç po e kritikojnë ata të cilët e kanë humbur besimin në të, apo ta mbrojë duke u tërhequr nga gjithçka që ka premtuar, vetëm e vetëm për ta ruajtur elektoratin e tij nacionalist./FolDrejt/
