Aleksandër Vuçiq, Ana Bërnabiq, politikanët serbë të frontit të pozitës, bashkë me një pjesë të analistëve në Kosovë, i kanë cilësuar si dështim zgjedhjet e fundit lokale në veri. Ndërmjet ngecjeve, kërcënimeve dhe premtimeve për instalim të rendit të ri qeverisës dhe shtrirjes së sovranitetit, bashkësia ndërkombëtare po kërkon që marrëveshjet e fundit të arritura në Bruksel e Ohër, të zbatohen sa më parë, shkruan Fol Drejt.
Bojkoti i serbëve në zgjedhjet e fundit, bëri që pjesëmarrja në zgjedhje të ishte 3.47%. Duke iu referuar kësaj shifre, një pjesë e opinionit publik në Kosovë e Serbi, po e konteston legjitimitetin e tyre.
ShBA dhe BE krah Kosovës
Por zgjedhjet e 23 prillit të mbajtura në Mitrovicë të Veriut, Leposaviq, Zveçan e Zubin Potok, ndonëse u karakterizuan nga kjo pjesëmarrje e ulët e qytetarëve, ato ishin të qeta dhe pa incidente. Megjithatë, procesi është vlerësuar nga Shtetet e Bashkuara të Amerikës (ShBA) dhe Bashkimi Evropian (BE), në përputhje me kushtetutën dhe ligjet e Kosovës.
“Na vjen keq që jo të gjitha partitë e shfrytëzuan të drejtën e tyre demokratike për të marrë pjesë në zgjedhjet e sotme. Pjesëmarrja në zgjedhje ndihmon për t’u siguruar që udhëheqësit janë përfaqësues të popullatave të cilave u shërbejnë. Votimi është një liri kritike e shoqërive demokratike. Ne i njohim përpjekjet e zyrtarëve zgjedhorë kosovarë për t’i vënë vendet e votimit në dispozicion të qytetarëve që dëshirojnë të ushtrojnë të drejtën e tyre të votës, duke minimizuar pikat e mundshme të tensionit”, thuhet në komunikatën e lëshuar nga ambasada e ShBA, pas përfundimit të procesit zgjedhor. Sipas ambasadës zgjedhjet ishin në “përputhje me Kushtetutën dhe ligjet e Kosovës.”
Një qëndrim të ngjashëm karshi procesit të zgjedhjeve mbajti edhe BE”
“Zgjedhjet janë mbajtur në përputhje me kuadrin ligjor të Kosovës dhe se janë bërë përpjekje që ato të zhvillohen në mënyrë të qetë dhe të rregullt. Në të njëjtën kohë, BE-ja shpreh keqardhjen që jo të gjitha partitë dhe komunitetet e shfrytëzuan të drejtën e tyre demokratike për të marrë pjesë dhe votuar në zgjedhje”, thuhet në deklaratën e BE-së, ndërsa theksohet se “pjesëmarrja shumë e ulët, veçanërisht në mesin e qytetarëve serbë të Kosovës, tregon se ky proces nuk është dhe nuk mund të konsiderohet si i zakonshëm”.
Kontestimi i legjitimitetit, nga jolegjitimët
Veç që nuk mori pjesë në zgjedhje, Lista Serbe bëri thirrje për bojkot masiv të këtij procesi. Vendimi i partisë më të madhe serbe në vend, u ndihmua edhe nga Beogradi zyrtar. Vetë Vuçiq pas zgjedhjeve tha se “njerëzit tanë në Kosovë kanë treguar se në cilin vend duan të jetojnë.” Edhe kryeministrja Bërnabiq, nuk qëndroi prapa në këtë pikë. Ajo tha se zgjedhjet e mbajtura nën monitorim të rrebtë të forcave të policisë dhe KFOR-it, “getoizuan” komunitetin serb në Kosovë.
Millan Radojçiq një figurë kontraverse, i akuzuar shpesh si njeriu i nëntokës në veriun e Kosovës, ndryshe edhe nënkryetar i Listës Serbe ka thënë së fundmi se populli serb në Kosovë “nuk do të lejojë kurrë” që komunat me shumicë serbe në veri të vendit të udhëhiqen nga ata që kanë fituar “1 apo 2 për qind të votave” në zgjedhje.
Por legjitimiteti i zgjedhjeve do të kontestohej edhe variantin e pjesëmarrjes së Listës Serbe në Kosovë. Publicisti Nexhmedin Spahiu për Fol Drejt tha dje se politikanët e kësaj partie nuk janë betuar përpara flamurit të Kosovës duke i dëshmuar se përherë e kanë kontestuar sovranitetin e republikës. Për analistin Spahiu, sado i vogël ky progres i republikës, është për t’u vlerësuar. Ai iu druhet incidenteve të mëtejme, sidomos në fazën e ndërrimit të pushteteve lokale, tashmë me fituesit e zgjedhjeve të fundit.
Garantuesit e sovranitetit
Mbetet për t’u parë, por institucionet e Kosovës, janë shfaqur të vendosura në lidhje me procesin e ndërrimit të pushtetit, pas zgjedhjeve të fundit.
Ministri i Punëve të Brendshme Xhelal Sveçla ka thënë se përkundër klimës jo të mirë, kryetarët e rinj, nuk do të kenë probleme.
Në një prononcim për REL ministri ka thënë se kryetarët e rinj “do të punojnë normalisht në objektet shtetërore të Kosovës” dhe se “të gjitha objektet e administratës në Republikën e Kosovës janë pronë e shtetit. Nuk janë pronë e askujt dhe nuk janë subjekt i dëshirave të askujt. Ata [kryetarët e rinj] do të funksionojnë aty normalisht.”
ShBA-të dhe BE nga ana tjetër, kërkojnë nga të dyja vendet (Kosova dhe Serbia), që në një periudhë sa më afatshkurtër, të jetësojnë marrëveshjen e fundit të arritur në parim, në Ohër.
Edhe pala serbe po insiston jetësimin e Asociacionit si pika më problematike e diskutimeve të fazës së fundit. Ende nuk dihet qartë statusi i këtij instrumenti politik, por grupet punuese, me aq sa është mësuar për opinionin publik, janë duke punuar në të.
Njohësit e zhvillimeve konsiderojnë se jetësimi i kësaj marrëveshjeje, do t’i eliminonte pretendimet e Serbisë ndaj veriut të Kosovës dhe përfundimisht të dyja vendet do të futeshin në një fazë të përmirësimit të raporteve ndërshtetërore./FolDrejt/
