Çmimet e naftës shënuan sot rritjen më të madhe ditore në pothuajse një vit pasi vendet anëtare të OPEC+ njoftuan se do të ulin prodhimin, shkruan Klix, përcjell Fol Drejt.
Nafta e papërpunuar amerikane West Texas Intermediate u ngrit deri në 8 për qind dhe u tregtua me 79,39 dollarë për fuçi. Nafta Brent u tregtua me 83,89 dollarë për fuçi, që është një rënie prej katër dollarësh ose pesë për qind krahasuar me periudhën e mëparshme.
Tregu i naftës u trondit pasi anëtarët e Organizatës së Vendeve Eksportuese të Naftës dhe aleatët e tyre, përfshirë Rusinë, njoftuan një ulje të prodhimit prej 1.16 milionë fuçi në ditë.
Ky vendim pasoi një video-takim të panelit ministror të OPEC+, ku ndër të tjera bëjnë pjesë edhe Arabia Saudite, por edhe Federata Ruse.
“Prodhuesi më i madh, Arabia Saudite, tha se do të ulte prodhimin me 500,000 fuçi në ditë. Ministria e Energjisë Saudite tha se ulja e prodhimit ishte një masë paraprake që synon të mbështesë stabilitetin e tregut të naftës”, shkruan Reuters.
Meqë ra fjala, me njoftimin e ri për reduktimin e mëtejshëm të prodhimit, vëllimi i shkurtimeve brenda anëtarëve të OPEC+ arrin në 3.66 milionë fuçi në ditë, që përfaqëson rreth 3.7 për qind të kërkesës globale.
Me rastin e shpalljes së OPEC+, Shtëpia e Bardhë njoftoi se kjo lëvizje është e paarsyeshme dhe do të ketë një efekt të keq në të gjithë tregun. /FolDrejt/
