Çmimet e naftës në tregun botëror u rritën javën e kaluar, por ranë me rreth 12 për qind gjatë gjysmës së parë të vitit për shkak të rritjes së mëtejshme të normave të interesit si pasojë e inflacionit të lartë, transmeton Klix, përcjell Fol Drejt.
Çmimi i një fuçie nafte në tregun e Londrës u rrit me 1.4 për qind javën e kaluar, duke arritur në 74.90 dollarë, ndërsa në tregun amerikan çmimi i fuçisë u rrit me 2.1 për qind, në 70.64 dollarë.
Megjithatë, këto rritje vetëm sa e zbutën rënien në nivele tremujore dhe gjashtëmujore. Në gjashtëmujorin e parë të këtij viti, çmimi i një fuçi nafte në tregun e Londrës ra me 12.8 për qind, ndërsa në atë amerikan me 12 për qind.
Ky është rezultat i ngadalësimit të rritjes ekonomike të vendeve perëndimore, pasi bankat qendrore kanë rritur normat e interesit për më shumë se një vit për shkak të inflacionit të lartë.
Me ngadalësimin e rritjes ekonomike zvogëlohet edhe kërkesa. Gjithashtu, ekonomia kineze, e cila është importuesi më i madh i naftës në botë, nuk po e merr veten nga kriza e koronës aq shpejt sa pritej pas heqjes së masave kufizuese lidhur me COVID-19.
Për të mbështetur çmimet, Arabia Saudite njoftoi një ulje të prodhimit me një milion fuçi shtesë në ditë në korrik. OPEC dhe aleatët e tij gjithashtu zgjatën një marrëveshje për të ulur prodhimin deri në fund të vitit.
Megjithatë, autoritetet monetare të vendeve perëndimore, përfshirë Rezervën Federale të ShBA dhe Bankën Qendrore Evropiane, po njoftojnë rritje të mëtejshme të normave të interesit për të frenuar inflacionin, gjë që do të ngadalësojë më tej rritjen ekonomike.
Analistët parashikojnë një vazhdimësi të mëtejshme të rënies së çmimit të naftës. Një rritje e mundshme mund të ndodhë në fund të vitit, kur kufizimet e prodhimit çojnë në një deficit të mundshëm. Në një sondazh të Reuters me 37 ekonomistë dhe analistë, çmimet nuk kanë gjasa të rriten këtë vit, duke pasur parasysh problemet e ekonomisë globale. /FolDrejt/
