Në kohën kur inteligjenca artificiale u bë kryetemë e diskursit publik, një kompani nga Kosova arriti që me teknologji inovative të bëhet një nga pionerët e ruajtjes së integritetit profesional dhe akademik që mund të cenohet nga AI.
Sot, Crossplag, si një nga kompanitë më inovative në fushën e mbrojtjes së integritetit nga intelegjenca artificiale, u ble nga kompania e njohur norvegjeze, Inspera, duke shënuar kështu një nga sukseset më të mëdha në fushën e teknologjisë në histori të Kosovës.
Lajmi u konfirmua në një njoftim për media nga Inspera, e cila konfirmoi blerjen e kompanisë Kosovare, duke e cilësuar platformën Crossplag si një vlerë të shtuar e cila do të sigurojë integritet akademik për klientët e tyre ndërkombëtar.
“Ne jemi të emocionuar të mirëpresim Crossplag në familjen Inspera,” tha Andrew Cons, CEO Global në Inspera. “Kjo blerje përputhet me angazhimin tonë për përmirësimin dhe inovacionin e vazhdueshëm të vlerësimeve dixhitale. Integrimi i aftësive të Crossplag do t’u sigurojë klientëve tanë mjete më të fuqishme që sigurojnë integritet akademik dhe nxisin praktika të drejta vlerësimi.”
Blerja e Crossplag nga një ndër kompanitë më të rëndësishëme në fushën e teknologjisë në edukim, dëshmon edhe njëherë teknologjinë unike të krijuar nga një grup i të rinjëve entuziast nga Kosova, të cilët me profesionalizëm arritën të krijonin një kompani që i adreson problemet më të rëndësishme që krijohen nga intelegjenca artificiale.
Si garancë e origjinalitetit dhe integritetit, Crossplag është nje nder platformat e para në botë që arrin të detektoj plagjiaturën në kombinim të 100 gjuhëve të ndryshme, duke u mbështetur në një arkivë të jashtëzakonshme. Sistemi i integruar i Crossplag është në gjendje që të analizojë mijëra fjalë brenda pak sekondave, duke bërë vlerësimin e punimeve origjinale shumë të lehtë.
“Ekipi ynë ka punuar në mënyrë të palodhur prej vitesh për të zhvilluar një teknologji të avancuar të zbulimit të plagjiaturës i cili mbulon disa gjuhë dhe përfshin inteligjencën artificiale. Gjithnjë i kemi dhënë prioritet privatësisë dhe sigurisë së të dhënave, vlera që na bashkojnë edhe me Inspera. Së bashku synojmë tu ofrojnë institucioneve në mbarë botën një alternativë të qëndrueshme për ruajtjen e integritetit akademik që përqendrohet tek inovacioni, privatësia e të dhënave dhe një qasje më holistike ndaj vlerësimeve.” – tha themeluesi dhe CEO i Crossplag Besart Kunushevci.
Rreth Inspera:
Inspera është kompani lidere globale në ofrimin e provimeve dixhitale, duke mbështetur institucionet arsimore dhe organizatat profesionale në mbarë botën. E themeluar në vitin 1999, Inspera u shërben përdoruesve aktivë në mbi 160 vende në pesë kontinente, duke integruar me platformat kryesore të teknologjisë arsimore si Anthology’s Blackboard Learn, Instructure Canvas, Brightspace nga D2L dhe Moodle.
Rreth Crossplag:
Crossplag është një kompani që merret me zbulimin e plagjiaturës dhe përmbajtjes së gjeneruar me AI, e specializuar në zgjidhjet e teknologjisë të avancuara për integritetin akademik. Ajo eshte themeluar ne Kosove nga nje grup ekspertësh në këtë fushë, dhe shpejtë fitoi njohje ndërkombëtare. Crossplag ka zhvilluar një qasje inovative për zbulimin e plagjiaturës, përmbajtjes të gjeneruar nga Inteligjenca Artificiale si dhe përmbajtjes të rishkruar ose të përkthyer. Kompania është e përkushtuar t’u ndihmojë edukatorëve për të ruajtur integritetin akademik dhe për të mbajtur standartet më të larta të arsimit.
Ekipi i Crossplag ka dëshmuar se puna dhe talenti nga Kosova mund të përkthehet në sukses në arenën ndërkombëtare, duke shërbyer edhe si një shembull frymëzues për kompanitë e tjera vendore në fushën e teknologjisë.
