Salla kryesore e Kuvendit të Kosovës, sot është shndërruar në arenë përplasjesh ndërmjet pozitës dhe opozitës. Temë e debatit ishte propozimi i Qeverisë së Kosovës, për masat e reja energjetike, propozim ky që nuk kaloi, për mungesë kuorumi, transmeton Fol Drejt.
Përplasje e polemika pati mjaft, por edhe momente qesharake. Një ndër to ishte ai i kur deputeti Armend Zemaj e cilësoi në mënyrë të pazakontë Kryeministrin Albin Kurti. Ai me ironi tha se “Kurti është yll që e ndriçon botën.”
“Para se të ngrisë pyetjen për krizën energjetike, i keni parë ato dritat në Qeveri ndezur, në njërën anë kryeministri e në anën tjetër ministrja dhe Komiteti. Nja 10 minuta qetësi derisa nis diskutimi, e pastaj ministrja thotë që e kemi një dilemë: qysh është e mundshme, me pas krizë të energjisë elektrike menjë kryeministër si ti? Kryeministri thotë se ka qenë e pritshme, se edhe vendet e rajonit kanë marrë masa. Ministrja edhe ata të Komitetit, në stilin militant të pakënaqur me përgjigjen i drejtohen: Kryeministër nuk ka terr që të sfidon ty, sepse ti je yll që ndiçon botën e lëre më Kosovën”, tha
Sipas Zemajt, Qeveria Kurti nuk ka reaguar me kohë, përkundër paralajmërimit se kriza do ta godas edhe vendin tonë:
“Ndonëse me vonesë, tashmë të gjithë e kanë kuptuar që terri i Kurtit është vet drita e vendit tonë. Të nderuar kolegë deputet, e nderuara ministre, kriza nuk fillon sa hap e mbyll sytë. Qeveria e ka ditur që do të ketë krizë energjetike. Çka keni reaguar? Edhe sot treguat, asgjë fare”, tha Zemaj në Kuvendin e Kosovës.
Kuvendi për momentin ndodhet në pauzë, ndërsa deputetët do të kthehen në sallë për të debatuar për krizën energjetike, debat ky i ftuar nga Grupi Parlamentar i AAK-së./FolDrejt/
