Presidenti serb Aleksandër Vuciq ka kryer një intervistë për median austriake Der Standard, ku ka folur për situatën e fundit ballkanike dhe europiane.
Në lidhje me krijimin e një zone mini-shengen në Ballkanin Perëndimor, Vuciq theksoi se kjo erdhi pasi anëtarësimi në BE është shtyrë për një kohë të pacaktuar, “andaj ne tani kërkojmë që të arrijmë lirinë në lëvizje, tregti” në vendet tona.
“Tani duhet të kemi pasaportë për të shkuar në Tiranë ose Shkodër. Shpresojmë që deri në fund të vitit do mund të lëvizim lirshëm vetëm me dokumente identifikimi,” tha Vuciq, përcjell foldrejt.com. “Poashtu punojmë në atë drejtim që lejet e punës të dhëna në Tiranë të vlejnë edhe në Beograd.”
Përndryshe bashkimi doganor pritet të ndodhë në 2022.
Albin Kurti i frustruar
Në lidhje me Kosovën, Vuciq ka theksuar se nuk do ketë fillim të dialogut pa tërheqjen e tarifës 100 përqind. Kurse në lidhje me kërkesën e Albin Kurtit se do largonte tarifën 100 përqind, nëse njihen targat kosovare, numri një i qeverisë serbe shtoi se përkëtë ekziston një marrëveshje, “që të ngjitet një etiketë, por në rast se ata kërkojnë diçka më shumë, duhet të shihet se çfarë është ajo.”
“Kosova kurrë nuk ka qenë një shtet dhe ata janë të frustruar për këtë, andaj edhe flasin për budallallëqe,” shtoi më tej Vuciq.
Në lidhje me mundësinë e njohjes së Kosovës, Vuciq tha se “nuk është pa shumë gjasa, që ne do njohim Kosovën”, por të dyja palët duhet të humbin diçka për të pasur një situatë “win-win”.
“A do marrim anëtarësimin në BE në rast se njohim Kosovën ose do ndodhë si me rastin e Maqedonisë Veriore?”, pyeti retorikisht ai.
Por Vuciq la me dije se përveç tërheqjes së tarifës 100 përqind duhet të lejohet edhe diskutimi mbi territoret ose status autonom për veriun. “Ndryshe pse duhet të bisedojmë?”
Në fund Vuciq tha se nobelisti më i ri Handke së shpejti do vizitojë Serbinë dhe do takohet personalisht me të./Foldrejt.com
