Kryeministri i Kosovës Albin Kurti për Veçernji List të Zagrebit ka thënë se presidenti serb Aleksandar Vuçiq është i mërzitur nga demokracia dhe se Kosova nuk po armatoset sepse ka frikë nga Serbia, por për t’iu bërë roje bazave ushtarake serbe, shkruan N1info, transmeton Fol Drejt.
Sipas Kryeministrit Kurti “në veri të Kosovës ka ditë të qeta dhe të mira, sa herë që nuk ka urdhër nga Beogradi për dhunë”.
Ai ka vlerësuar se serbët në Kosovë jetojnë shumë më mirë se serbët në Serbi, por se “kriminelët në Serbi jetojnë shumë më mirë në Kosovë”.
“E shihni që protestat e Vuçiqit në Kosovë janë të dhunshme, por protestat kundër Vuçiqit në Beograd nuk janë”, shtoi Kurti.
Ai pohon se jetën e serbëve në Kosovë ua vështirëson Beogradi, i cili nuk i lejon ata të integrohen.
“Njerëzit që nuk integrohen nuk jetojnë shumë mirë, dhe ata që integrohen jetojnë më mirë. Beogradi nuk dëshiron që ata të jetojnë më mirë, ai dëshiron të ushqejë tensionet dhe potencialin për destabilizim në një farë mënyre” – citohet të ketë thënë Kryeministri Kurti.
Siç theksoi ai, për të pasur një zgjidhje me Serbinë, është e nevojshme të zbatohet marrëveshja nga Brukseli, dhe “për pajtim është e nevojshme që Serbia të distancohet nga Millosheviqi dhe Putini”.
I pyetur nëse Beogradi dëshiron ndarjen e Kosovës, Kurti është përgjigjur se gjithçka tregon se kjo ide nuk ka vdekur.
Kur bëhet fjalë për Asociacionin e Komunave Serbe, ai është “i gatshëm që komuniteti serb në Kosovë të organizohet më mirë për të marrë sa më shumë shërbime publike cilësore dhe për të respektuar të gjitha të drejtat e tyre, të cilat sipas planit të Ahtisarit janë mjaft të gjera, por e gjithë kjo duhet të jetë brenda Kushtetutës së Kosovës”.
Kurti iu referua edhe letrës së Federica Mogherinit, dikur dërguar Isa Mustafës, në të cilën shkruhet se ky komunitet “nuk mund të ketë pushtet ekzekutiv dhe as të përfaqësojë nivelin e tretë të qeverisjes”.
Ai pohon se ka edhe qëndrimin e qeverisë amerikane se Asociacioni “duhet të jetë bashkërendues i kompetencave ekzistuese që kanë komunat”./FolDrejt/
