Greva e paralajmëruar në sektorin e arsimit dhe sektorëve të tjerë nga ana e sindikatave të Kosovës, duket që do të vazhdojë edhe në ditët në vijim.
Të paktën kështu kanë thënë gjatë një konference të jashtëzakonshme për media, krerët e këshillit grevist nga Bashkimi i Sindikatave të Pavarura të Kosovës (BSPK) dhe nga Sindikata e Bashkuar e Arsimit, Shkencës dhe Kulturës (SBAShK), raporton Fol Drejt.
Ajo që sipas tyre i ka nxitur të jenë të vendosur në pozicionin e tyre, ka qenë deklarata e fundit e Hekuran Muratit, ministër në Ministrinë e Financave.
“E kemi vlerësuar deklaratën e Muratit dhe ka krijuar shqetësime dhe ne do të kemi reagimin me kohë dhe ekspertët e fushës së drejtësisë janë në konsultime dhe do të insistoj të përgatitet lënda dhe do të drejtohet ndaj ministrit Hekuran Murati…. i cili në vend që të jetë zë i qeverisë në emër të uljen së tensioneve ai kërcënon për të frikësuar dhe ngulfatur zërin e grevistëve.”
Ky i fundit, gjatë një konference për media para disa ditësh tha se:
“Përderisa e drejta e grevës është e garantuar, praktikat nuk e obligojnë punëdhënësin për aq kohë sa është në grevë, grevistët të paguhen. Kur punëtorët hyjnë në grevë, ata duhet të paguhen nga sindikatat. D.m.th. çdo sindikatë, kontributet që mbledhë nga anëtarët e saj e krijon fondin për greva dhe në rasti kur vendoset nga sindikata që të hyjnë në grevë, punëtorët kompensohen nga ai fond për ditët që nuk janë në punë.”
Kjo deklaratë u cilësua si skandaloze dhe e papranueshme, duke treguar më shumë pozicionin e Qeverisë së Kosovës, e cila nuk duket e interesuar të ulet, t’i zbus tensionet dhe të arrijë ndonjë marrëveshje.
Sipas anëtarëve të këshillit grevist, greva do të vazhdojë për aq kohë sa qeveria të mos ndërroj qëndrim./FolDrejt/
