Ish kryeministri, ministri i jashtëm dhe njëri ndër aleatët kryesorë të presidentit turk Rexhep Taip Erdoganit, ka kritikuar ashpër partinë në pushtet AKP, bën me dije foldrejt.com. Të hënën, Ahmet Davutoglu, kritikoi kthesën e AKP që bëri aleancë me nacionalistët e MHP, duke humbur Stambollin dhe Ankaranë.
Mes tjerash, Davutoglu kritikoi politikat ekonomike të partisë së tij, sjelljen me mediat dhe dëmet e shkaktuara si pasojë e përçarjes mes pushtetit dhe institucioneve turke.
Kjo është ankesa e parë publike e Davutoglut, tre vjet pasi ka dalë nga funksionet partiake. Ajo që mësojmë nga kjo sjellje, është se ai nuk kritikoi mikun e tij Erdogan përpara zgjedhjeve për ta futur në vështirësi, bile mbështeti masovikisht në qytetin e tij Konja, ku Erdogan fitoi si çdoherë 70 përqind të votave. Megjithatë, pas sprovës (zgjedhjeve), ai e ndjen të kritikojë disa veprime të ish aleatit të tij në të “mirë të idesë” që AKP përfaqëson.
“Rezultati zgjedhor thotë se aleancat politike kanë dëmtuar rëndë partinë tonë në dy drejtime, në nivelin e votave dhe identitetin partiak,” tha mes tjerash Davutoglu në një deklaratë publike prej 15 faqesh.
Më tej, strategu neo-otomanist Davutoglu tha se reformat partiake, kanë ndryshuar ndjeshëm vitet e fundit, duke zëvendësuar etosin liberal me qasje statike e bazuar në siguri dhe që nxit shqetësimet për ruajtjen e status-kuosë.
Poashtu kritikoi politikat ekonomike, veçanërisht nga largimi i tregut të lirë, që ka frikësuar ndjeshëm investitorët e huaj. Turqia prej vitesh ndodhet në luftë me inflacionin dhe ka rrezik të bie në një recension të gjatë.
“Arsyeja kryesore e krizës ekonomike është kriza administrative. Besimi në administratë zhduket, nëse politikat ekonomike janë larg nga realiteti,” vijoi më tej Davutgolu, informon ekskluzivisht foldrejt.com.
Në fund ai kritikoi edhe nepotizmin në administratë.
Prej para disa muajsh në foldrejt.com, shkruanim se në Turqi përgatitet një lëvizje e re që mund të krijojë partinë e re me figurat si Ahmet Davutoglu, Abdullah Gyl, Ibrahim Kallën dhe Hakan Fidan. Kjo duket më afër realitetit, edhepse Davutgolu nuk e thotë akoma publikisht, bile duke e mbyllur letrën si vijon: “I bëj thirrje ekzekutivit të partisë sonë dhe trupit relevant të vlerësojë me gjakftohtësi këto këshilla për vizionin e ardhmërisë tonë.”
Ideja e partisë mbi individin
Kjo është sjellje fisnike e shokut të mirë, që këshillon vëllain pas zgjedhjeve, dhe jo kur është në rrezik. Një vlerë e shtuar, që duhet të merret edhe te figurat udhëheqëse shqiptare, që të mos presin në besë miqtë në kohët më të vështira./Foldrejt.com
