Ndërkohë që aparteidi serb mbi shqiptarët e Kosovës, i kishte lënë këta të fundit pa asgjë, duke ua mohuar edhe të drejtat elementare, të paktë ishin ata që kishin guxim t’i kërkonin hapur, e me zë që nuk iu dridhej, këto të drejta. Adem Demaçi (1936-2018), ishte njëri prej tyre, shkruan Fol Drejt.
Sot në përvjetorin e vdekjes së tij, Kryeministri i Republikës së Kosovës Albin Kurti, e ka cilësuar Adem Demaçin si një “figurë aq e jashtëzakonshme saqë unike e kombit shqiptar.”
Se ishte unik, e dëshmon edhe një video e vjetër e një interviste e realizuar në mes të Beogradit, në televizionin shtetëror serb. Demaçi, i vetëdijshëm ku ndodhej, pak kohë pasi kishte dalë nga burgu i cili nuk kishte arritur që t’ia edukonte “rrebelizmin”, ai shprehet qartë para opinionit publik serb:
“Kosova është në Kosovë, Kosova është territori ynë.”
Sikur ta kishte parandjerë se situata do të përkeqësohej dhe vendi do të përfundonte në luftë për çlirim, Demaçi i këshillon qytetarët serb nga studioja televizive, që të tërhiqen nga politikat fashiste e ekspansioniste:
“Unë nuk po kërcënoj, por po e lus popullin serb që të heq dorë nga kjo politikë që të mos vijë deri te gjakderdhja, pastaj do të jetë vështirë që të jetojmë së bashku” – pat thënë Adem Demaçi në Beograd edhe atë në vitin 1993.
Ai ishte i patrembur, stoik, vizionar dhe mbi të gjitha: frymëzues i brezave që e kërkuan lirinë duke u flijuar për atdhe./FolDrejt/
