Vendimi i Qeverisë së Kosovës për shpalljen e organizatave “Mbrojtja Civile” dhe “Brigada e Veriut” si organizata terroriste nuk është marrë në koordinim me ShBA-në dhe partnerët e tjerë ndërkombëtarë, thuhet në përgjigjen e Departamentit të Shtetit për Zërin e Amerikës, përcjell Fol Drejt.
“Vendimi është dashur të koordinohet me partnerët më të afërt ndërkombëtarë, përfshirë ata që kanë përgjegjësi parësore për të siguruar stabilitetin e Kosovës. I bëjmë thirrje edhe një herë Kosovës që të përmbahet nga lëvizjet e njëanshme në një kohë kur po punohet me të gjitha palët për zgjidhjen e krizës aktuale”, thuhet në përgjigjen e pyetjes së shërbimit shqiptar të Zërit të Amerikës.
U theksua se edhe ShBA-ja dënon “dhunën e papranueshme” ndaj ushtarëve të Misionit Paqeruajtës Ndërkombëtar të NATO-s në Kosovë (KFOR).
“Përgjegjësit për sulmet duhet të ndiqen penalisht – duke ndjekur procedurat e përcaktuara dhe me transparencë të plotë”, thuhet në reagimin e Departamentit të Shtetit.
Autoritetet e Kosovës kanë shpallur dje organizata terroriste “Mbrojtja Civile” dhe “Brigada e Veriut”, duke pretenduar se anëtarët e tyre janë përgjegjës për trazirat në veri të Kosovës dhe paraqesin kërcënim për rendin kushtetues dhe sigurinë.
Kryeministri i Kosovës, Albin Kurti pretendon se ato organizata kanë kryer aksione me elementë terroristë: sulme ndaj policisë së Kosovës, ndaj anëtarëve të misionit të Bashkimit Evropian në Kosovë dhe ndaj ushtarëve të KFOR-it.
Me “Mbrojtje Civile”, Qeveria e Kosovës nënkupton strukturën që ka ekzistuar në Kosovë dhe ka funksionuar në sistemin serb dhe ka reaguar në situata emergjente.
Ajo zyrtarisht ka pushuar së ekzistuari më shumë se pesë vjet më parë në bazë të marrëveshjes ndërmjet Kosovës dhe Serbisë, të arritur në dialog, për shpërbërjen e të ashtuquajturave struktura paralele.
Anëtarët e saj më pas kaluan për të punuar në institucionet e Kosovës.
Nuk ka të dhëna për themeluesin dhe organizatën “Brigada e Veriut”. Mësuam për të pasi kishte shkruar mbishkrime në veri të Mitrovicës.
Organizata i dërgon njoftimet e saj për publikun përmes platformës Telegram nga llogaria “Brigada e Veriut”. Në përgjigje të vendimit të autoriteteve të Kosovës, u tha se do të vazhdojnë punën.
“Ky vendim i institucioneve të përkohshme nuk do të na pengojë të luftojmë për Serbinë dhe bashkimin, për mbijetesë dhe qëndrim në këto hapësira”, thuhet aty. /FolDrejt/
