Ka javë që Kuvendi i Republikës së Kosovës nuk ka mbajtur asnjë seancë. Për këtë ka reaguar Këshilli për Mbrojtjen e të Drejtave dhe Lirive të Njeriut (KMDLNj), shkruan Fol Drejt.
Përkundër pagave, honorarëve të majme dhe detyrimit moral që kanë përpara qytetarëve, deputetët e kuvendit ka tri javë që nuk kanë mbajtur seancë në kuvend.
Këtë fakt e ka theksuar në reagim edhe KMDLNj:
“Kemi hyrë në javën e tretë kur Kuvendi i Kosovës nuk e ka mbajtur asnjë seancë ndonëse ka pika të rendit të ditës të bartura edhe nga viti 2022. Në anën tjetër, me Rregulloren e re të Kuvendit kemi përfitime të ndjeshme, që nga kryetari i Kuvendit i cili, përfiton thuaja 80% më shumë krahasuar me më parë.
Linja e përfitimeve përfshinë edhe nënkryetarët, deputetët dhe të tjerët puna e të cilëve ndërlidhet me Kuvendin e Kosovës. Rritja e përfitimeve në vendet normale kryesisht kushtëzohet me rritje të punës dhe përgjegjësive si dhe performancës që vlerësohet si e suksesshme ndërkaq, në rastin e Kuvendit të Kosovës kjo rritje është shkelje e standardeve minimale të moralit sepse kjo rritje është në kundërshtim të plotë me punën që e bëjnë përfituesit, të pandërgjegjshëm dhe të papërgjegjshëm duke filluar nga kryetari i Kuvendit që po i prinë këtij shpërdorimi institucional, moral dhe material.
Kategoritë e margjinalizuara (pensionistët, përfituesit e ndihmave sociale, veteranët e luftës dhe kategoritë përfituese nga lufta) marrin kompensim simbolik apo kompensim social në kohën kur pikërisht këta e përbëjnë pjesën më të madhe të votuesve, deputetëve aktualë të Kuvendit të Kosovës, të cilët, në vend se ta përfaqësojnë vullnetin e votuesve, e shpërdorin besimin që iu është dhënë” – thuhet ndër të tjera në reagim.
Sipas KMDLNj-së askush nuk e ka vënë në krizë privilegjin e pamerituar të deputetit kosovar. Aq më keq, në këto rrethana krejt të pabarabarta, askush nuk shqetësohet për kategoritë e margjinalizuara, si fjala vjen pensionistët.
Sipas KMDLNJ-së “tash, pas miratimit të Rregullores së re të Kuvendit të Kosovës që ua trashë lëngun të gjithë përfituesve, jo që nuk po mbahen seanca me një dinamikë të përshpejtuar për ta kompensuar kohën e humbur por, siç ndodhi në mbledhjen e fundit të Kryesisë së Kuvendit, nuk u sigurua kuorumi as për mbledhje të Kryesisë në të cilën do të përpilohej rendi i ditës për seancën e radhës.
Kuvendi i Kosovës ka mandat kushtetues dhe ligjor ta mbikëqyrë punën e qeverisë së Kosovës dhe po ndodhë pikërisht e kundërta; Qeveria e Kosovës është bërë më Kuvend se vet Kuvendi i Kosovës kurse kryefolësi i Kuvendit është bërë zëdhënës i qëndrimeve politike të qeverisë së Kosovës duke respektuar rreptësishtë hierarkinë; se pari deklarohet kryeministri pastaj, me një vonesë të vogël ia vërteton kryefolësi i Kuvendit” – vijohet tutje në reagim.
KMDLNj konstaton që kuvendi ynë, mbetët më përtaci në rajon. Sipas KMDLNj-së, deputetët e kuvendit të krijojnë përshtypjen se duan ta përfundojnë mandatin “duke i rënë flladit” e ndoshta edhe për të “provokuar zgjedhje të reja” në një moment të papërshtatshëm sipas shumë vlerësimeve./FolDrejt/
