Deputeti i AAK-së, Besnik Tahiri, ka njoftuar se sot deputetët e Aleancës janë takuar me delegacionin nga Këshilli i Ambasadorëve Amerikanë, shkruan Fol Drejt.
“Bashkë me kolegët deputetë nga AAK, kishim kënaqësinë që në ambientet e Kuvendit të Kosovës të presim në takim delegacionin nga Këshilli i Ambasadorëve Amerikanë. Në takim falënderuam ShBA-në për mbështetjen e tyre në të gjitha etapat duke theksuar se miqësia mes dy vendeve është e përjetshme.”, shkroi Tahiri në Facebook.
Tahiri tha se në takim kanë theksuar se synimi i Kosovës është anëtarësimi në NATO, proces ky që do të avancojë përspektiven integruese të Kosovës. Partneriteti me shtetin e IOWA deri më tani ka qenë një tregim suksesi sa i përket bashkëpunimit në forcimin e kapaciteteve ekzistuese të ushtrisë sonë.
“Gjithashtu, kërkuam ndihmën e ambasadorëve për lobim në çështjen e liberalizimit të vizave nga SHBA për qytetarët e Kosovës. Ky takim është zhvilluar me ftesë të Këshillit të Ambasadorëve Shqiptarë, të cilët i falenderuam për angazhimin e tyre të jashtëzakonshëm dhe realizimin e kësaj vizite.”, u shpreh tutje Tahiri. /FolDrejt/
