Një pjesë e deputetëve të Lëvizjes Vetëvendosje (LV), e kanë shprehur qëndrimin e tyre hapur KUNDËR Asociacionit, shkruan Fol Drejt.
Ndërsa përfaqësuesit amerikanë për bisedimet Kosovë Serbi dhe akterët e tjerë ndërkombëtarë të involvuar në procesin e bisedimeve po bëjnë thirrje për themelimin e asociacionit, në opinionin publik kanë shpërthyer reagimet.
“Që nga fillimi, Kosova ka thënë se Plani Franko-Gjerman është bazë e mirë për diskutime të mëtejshme. Ndërkohë që Serbia, në mbledhjen e Këshillit të saj të Sigurisë, me 27 tetor zyrtarisht dhe njëzëri e kishte refuzuar atë propozim duke e cilësuar si të papranueshëm. Serbia as sot nuk e ka pranuar propozimin Franko-Gjerman. Rendi i gjërave ishte i qartë: normalizim i plotë i marrëdhënieve me njohje reciproke në qendër, siç ka thënë Presidenti Biden, përmes planit Franko-Gjerman, të mbështetur nga ShBA. Asociacioni nuk mund të jetë as në qendër as parakusht i normalizimit të marrëdhënieve sepse synim e ka abnormalizimin e vendit tonë” – ka shkruar Adnan Rrustemi, deputet nga radhët e Lëvizjes Vetëvendosje!
Por Rrustemi nuk është i vetmi që ka reaguar në këtë formë. Bashkëpartiakja e tij Tinka Kurti po ashtu ka paralajmëruar se themelimi i tij, vetëm do t’i forcojë lidhjet e serbëve të Kosovës me Beogradin:
“Asociacioni i komunave me shumicë serbe (Zajednica) i dobëson komunat me shumicë serbe dhe e forcon Serbinë. Kryetari i ardhshëm i Asociacionit do ta marrë aminin te Vuçiqi dhe Porfirije në Beograd, do t’i dominojë kryetarët e 10 komunave me shumicë serbe në Kosovë dhe do ta luftojë ministrin Nenad Rashiq në Prishtinë.”
Në një linjë me ta është shprehur edhe deputetja Arbëreshë Kryeziu Hyseni:
“Para 10 vjetëve ‘Zajednicën’ në parim e nënshkroi Hashim Thaçi me Ivica Daçiqin. Para 8 vjetëve ‘Zajednicën’ me përmbajtje e nënshkroi Isa Mustafa me Aleksandar Vuçiqin. Tash, po duan që ‘Zajednicën’ ta zbatojnë me kundërshtarin më të madh të saj Albin Kurtin” – ka shkruar ajo, duke e cilësuar këtë si “tendencë perverse mbi Kosovën.”
Ndërsa, më i ashpër në reagim ka qenë deputeti i po kësaj partie, Artan Abrashi.
Ai ka aluduar se Vuçiq dhe Brnabiç i kanë premtuar diçka Cholletit dhe Escobarit, por që nuk e di se çka.
