Deputeti i Grupit Parlamentar të Lëvizjes Vetëvendosje, nga Lista “GUXO”, Haxhi Avdyli, i ka reaguar ish-kryetarit të LDK-së, Isa Mustafa, pasi ky i fundit e bëri fajtore Vjosa Osmanin për mosliberalizimin e vizave për Kosovën.
Avdyli, përmes një postimi në Facebook, duke folur për Isa Mustafën, ka thënë se “ai që do të hyjë në histori si shkatërruesi i LDK-së, flet për liberalizim e do mbahet mend për asociacion”.
Postimi i plotë i deputetit Avdyli pa ndërhyrje:
“I paftyri që iku nga politika, akoma po flet e moralizon.
Ai cili do mbahet mend vetëm për koalicionet e natës me PDK-në përkundër që LDK kishte vendime tjera, shtiret e qan me lot krokodili.
Ai që do hyn në historinë si shkatërruesi i LDK-së, flet për liberalizim e do mbahet mend për asociacion.
Derisa Kosova ishte në fund të listës së vendeve më të korruptuara, në fund të listës së lirisë së fjalës e lirive politike një pjesë të meritës e ka Isa Mustafa dhe partneri tij PDK.
Prandaj për fund pse Kosova ishte në fund të pusit në shumë sektorë, njëri nga GËRMUESIT më të medhenj të atij pusi e ka emrin Isa Mustafa.
Por ditë të mira po vijnë për Kosovën, pa dyshim, por penzioneri idhnak ska për të bërë lum.
KOSOVA sot, nesër e çdo ditë po bën hapa përpara për të dalur nga pusi i Isa Mustafës dhe partisë besnike të tij PDK-së” (sic.), ka shkruar Avdyli.
Mustafa, përmes një postimi në Facebook, ka ironizuar me presidenten Osmani, duke thënë se “gati më shkuan lotët kur e lexova deklaratën e Vjosës se vetëm asaj i është dashur viza për këtë takim në Bruksel”. /Telegrafi/
